(Reuters)៖ អនុប្រធានាធិបតីអាមេរិក លោក JD Vance បាននិយាយថាសហរដ្ឋអាមេរិកកំពុងធ្វើការស៊ើបអង្កេតលើសេចក្ដីរាយការណ៍មួយដែលថាការវាយប្រហាររបស់យោធាអាមេរិកបានធ្លាក់ចំពិធីមង្គការមួយនៅក្នុងប្រទេសអ៉ីរ៉ង់ កាលពីដើមសប្ដាហ៍កន្លងទៅនេះ ខណៈការវិភាគមួយបង្ហាញថាពិធីមង្គលការនោះទំនងជាត្រូវបានវាយប្រហារដោយផ្ទាល់ពីគ្រាប់ផ្លោងមួយគ្រាប់របស់យោធាអាមេរិក។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី៤ ខែកញ្ញា ឆ្នាំ២០២៦។

បើតាមការវិភាគមួយកាលពីថ្ងៃព្រហស្បតិ៍ដោយក្រុមអ្នកជំនាញអាវុធដែលបានពិនិត្យលើរូបភាព និងវីដេអូ ត្រូវបានផ្ទៀងផ្ទាត់ដោយ Reuters ហេតុការណ៍ផ្ទុះមួយបានកើតឡើងនៅឯពិធីមង្គលការមួយនៅភាគខាងត្បូងប្រទេសអ៉ីរ៉ង់កាលពីថ្ងៃអង្គារ ហើយការផ្ទុះនេះដែរទំនងជាបង្កឡើងដោយការវាយប្រហារដោយផ្ទាល់ពីគ្រាប់ផ្លោងអាមេរិកមួយគ្រាប់ មិនមែនជាការខ្ទាត ឬផ្លាតគ្រាប់ពីការវាយប្រហារលើគោលដៅផ្សេងទៀតនោះទេ។ ពោលគឺគ្រាប់ផ្លោងនោះបានធ្លាក់ចំរោងការតែម្ដង។

សហរដ្ឋអាមេរិកមិនបានទទួលខុសត្រូវលើការវាយប្រហារនេះនោះទេ។ រដ្ឋបាលលោកប្រធានាធិបតី ដូណាល់ ត្រាំ កំពុងប្រឈមមុខនឹងសម្ពាធនៅក្នុងស្រុកឱ្យបិទបញ្ចប់សង្រ្គាមជាមួយអ៉ីរ៉ង់ដែលកំពុងធ្វើឱ្យប្រជាប្រិយភាពរបស់លោកធ្លាក់ចុះ នៅមុនការបោះឆ្នោតពាក់កណ្ដាលអាណត្តិនៅខែវិច្ឆិកាខាងមុខ។

គួរបញ្ជាក់ថា ទូរទស្សន៍រដ្ឋអ៉ីរ៉ង់ កាលពីថ្ងៃព្រហស្បតិ៍បានរាយការណ៍ថាស្ត្រីម្នាក់មានអាយុ ២២ឆ្នាំ បានស្លាប់នៅមន្ទីរពេទ្យ បន្ទាប់ពីរងរបួសក្នុងការវាយប្រហាររបស់សហរដ្ឋអាមេរិកដែលធ្លាក់ចំផ្ទះមួយ អំឡុងពិធីរៀបការ ដោយធ្វើឱ្យចំនួនអ្នកស្លាប់កើនដល់ ៥នាក់ និង៧០នាក់បានរងរបួស៕