(ហ្សឺណែវ)៖ អង្គការឧតុនិយមពិភពលោក (WMO) បានឱ្យដឹងកាលពីថ្ងៃព្រហស្បតិ៍ ទី៤​ ខែកញ្ញា ឆ្នាំ២០២៦ ថាបាតុភូតអាកាសធាតុ El Niño នឹងកាន់តែមានសភាពខ្លាំងក្លារហូតដល់ឆ្នាំ២០២៧ ហើយអាចនឹងក្លាយជាបាតុភូតដ៏ខ្លាំងក្លាបំផុតមិនធ្លាប់មាន ដែលបង្កើនហានិភ័យផ្នែកអាកាសធាតុចូលដល់ឆ្នាំ២០២៧។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

ទីភ្នាក់ងារអាកាសធាតុនៃអង្គការសហប្រជាជាតិមួយនេះ បានឱ្យដឹងថា ការព្យាកររបស់ខ្លួនបង្ហាញពីលទ្ធភាពជិត ១០០ភាគរយ ដែលថាបាតុភូត El Niño នឹងបន្តកើតមានរហូតដល់ខែកុម្ភៈ ឆ្នាំ២០២៧ ដោយសារតែសីតុណ្ហភាពទឹកសមុទ្រប៉ាស៉ីហ្វិក ឡើងកម្តៅខ្លាំងខុសពីធម្មតា។ WMO បញ្ជាក់ថាវាគឺជាលើកដំបូងហើយដែលខ្លួនរកឃើញកម្រិតប្រាកដប្រជាបែបនេះ។

«ប្រសិនបើនិន្នាការនេះនៅតែបន្ត វាអាចនឹងមានកម្រិតខ្លាំងជាងពេលណាៗទាំងអស់ តាំងពីយើងចាប់ផ្តើមការងារតាមដានមក។ និយាយឱ្យចំគឺ វាស្ថិតនៅកម្រិតខ្ពស់នៅលើតារាង»។ នេះជាការលើកឡើងរបស់លោកស្រី Celeste Saulo ប្រធាន WMO ក្នុងសន្និសីទសារព័ត៌មាននៅទីក្រុងហ្សឺណែវ។

គួរបញ្ជាក់ថា El Niño គឺជាបាតុភូតនៃការកើនឡើងសីតុណ្ហភាពផ្ទៃសមុទ្រនៅក្នុងតំបន់ប៉ាស៉ីកខាងកើត និងកើតឡើងរៀងរាល់២ ទៅ៧ឆ្នាំម្តង ហើយជាទូទៅមានរយៈពេល ១២ខែ ដោយបង្កឱ្យមានភ្លៀងធ្លាក់ខ្លាំង និងគ្រោះរាំងស្ងួតនៅទូទាំងតំបន់អាមេរិកឡាទីន។ បាតុភូត El Niño ដ៏ខ្លាំងក្លាអាចផ្លាស់ប្តូរគំរូទឹកភ្លៀង និងសីតុណ្ហភាពនៅទូទាំងពិភពលោក ហើយបង្កឱ្យមានគ្រោះធម្មជាតិធ្ងន់ធ្ងរ ដូចជាគ្រោះរាំងស្ងួត និងព្យុះទីហ្វុងជាដើម៕