(កៀវ)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយកាលពីថ្ងៃព្រហស្បតិ៍ ទី៣ ខែកញ្ញា ឆ្នាំ២០២៦ ថាលោករំពឹងទទួលស្វាគមន៍បេសកជនរបស់ប្រធានាធិបតីអាមេរិក ដូណាល់ ត្រាំ នៅទីក្រុងកៀវ ក្នុងពេលប៉ុន្មានថ្ងៃខាងមុខនេះ ដើម្បីបន្តកិច្ចខិតខំប្រឹងប្រែងស្វែងរកដំណោះស្រាយ សំដៅបិទបញ្ចប់ការឈ្លានពានរបស់រុស្ស៊ី។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

កិច្ចប្រឹងប្រែងផ្នែកការទូត ដើម្បីបញ្ចប់សង្គ្រាមដែលរុស្ស៊ីធ្វើឡើងប្រឆាំងអ៊ុយក្រែន អស់រយៈពេល៤ឆ្នាំកន្លះមកហើយនេះ បានជាប់គាំងចាប់តាំងតែពី សហរដ្ឋអាមេរិកបានបង្វែរការផ្តោតសំខាន់របស់ខ្លួន ទៅលើសង្គ្រាមជាមួយអ៉ីរ៉ង់។

លោក ហ្សេលេនស្គី បាននិយាយថា «យើងរំពឹងនឹងទទួលស្វាគមន៍បេសកជនរបស់លោកប្រធានាធិបតីអាមេរិកនៅទីនេះ ក្នុងទីក្រុងកៀវ។ យើងបានទទួលការបញ្ជាក់ពីពួកគេរួចហើយ»។ លោកបន្ថែមថា «ពួកគេនឹងបើកកិច្ចពិភាក្សានៅទាំងមូស្គូ និងទាំងនៅទីក្រុងកៀវ។ យើងរំពឹងថា កិច្ចប្រជុំនឹងធ្វើឡើងក្នុងរយៈពេលប៉ុន្មានថ្ងៃខាងមុខ»។

បេសកជនពិសេសរបស់លោក ត្រាំ គឺលោក Steve Witkoff ហើយនិងកូនប្រសារបស់លោកគឺលោក Jared Kushner បានដឹកនាំកិច្ចប្រឹងប្រែងការទូត ដើម្បីជួយសម្រុះសម្រួលជម្លោះរវាងរុស្ស៊ីនិងអ៊ុយក្រែន ដោយបានធ្វើដំណើរទៅកាន់ទីក្រុងមូស្គូជាច្រើនលើក ក៏ប៉ុន្តែអ្នកទាំងពីរ មិនធ្លាប់ធ្វើដំណើរមកកាន់ទីក្រុងកៀវឡើយ។

លោក ហ្សេលេនស្គី បានអះអាងថា កាលបរិច្ឆេទបឋមត្រូវបានកំណត់រួចរាល់ហើយ សម្រាប់ដំណើរទស្សនកិច្ចលើកដំបូង របស់បេសកជនទាំងពីរ មកកាន់រដ្ឋធានីអ៊ុយក្រែន ដែលក្នុងរយៈពេលមួយសប្តាហ៍កន្លងមកនេះ បានរងការវាយប្រហារដោយដ្រូន​និងមីស៊ីលរបស់រុស្ស៊ី កាន់តែខ្លាំងឡើង។ កាលពីខែកក្កដា លោក ហ្សេលេនស្គី បានឱ្យដឹងថា លោកបានពិភាក្សាជាមួយលោក Witkoff និងលោក Kushner ដើម្បីធ្វើឱ្យកិច្ចការទូតមានសន្ទុះឡើងវិញ និងនាំសន្តិភាពឱ្យកាន់តែខិតជិតមកដល់។

គួរបញ្ជាក់ថា ការឈ្លានពានរបស់រុស្ស៊ីលើអ៊ុយក្រែន បានក្លាយជាជម្លោះដ៏ធ្ងន់ធ្ងរបំផុតនៅអឺរ៉ុប គិតចាប់តាំងពីសង្គ្រាមលោកលើកទី២ មក ដោយបានឆក់យកជីវិតជនស៊ីវិលរាប់ពាន់នាក់ ព្រមទាំងកងទ័ពរាប់សែននាក់ របស់ភាគីទាំងពីរ៕