(ប៉ារីស)៖ ទីភ្នាក់ងារការពារព្រំដែននៃសហភាពអឺរ៉ុប (Frontex) នឹងបញ្ជូនទូកល្បាតទៅកាន់ច្រកសមុទ្រអង់គ្លេស (English Channel) និងសមុទ្រខាងជើង ដើម្បីជួយដល់ប្រតិបត្តិការស្វែងរក និងជួយសង្គ្រោះជនចំណាកស្រុក ក្រោយជំនួបពិភាក្សារវាងថ្នាក់ដឹកនាំប្រទេសបារាំង និងព្រីតថេន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី៤ ខែកញ្ញា ឆ្នាំ២០២៦។

អាជ្ញាធរដែនសមុទ្របានបញ្ជាក់ថា ទីភ្នាក់ងារ Frontex នឹងបញ្ជូនទូកល្បាតអេស្ប៉ាញចំនួន ២គ្រឿង និងទូកល្បាតលីទុយអានីចំនួន ១គ្រឿង ដើម្បីចូលរួមជាមួយក្បួនល្បាតរបស់បារាំង ក្នុងការឆ្លើយតបនឹងការកើនឡើងនៃទូកកៅស៊ូតូចៗដែលផ្ទុកមនុស្សលើសចំណុះដោយក្រុមរត់ពន្ធមនុស្ស។ វិធានការនេះ ធ្វើឡើងបន្ទាប់ពីប្រទេសព្រីតថេនបានយល់ព្រមផ្តល់ថវិកាជិត ៩០០លានដុល្លារអាមេរិក ក្រោមកិច្ចព្រមព្រៀងសន្តិសុខព្រំដែនរយៈពេល ៣ឆ្នាំ ជាមួយប្រទេសបារាំង ដើម្បីទប់ស្កាត់ការឆ្លងដែនខុសច្បាប់តាមផ្លូវទឹកនេះ។

គួរបញ្ជាក់ថា ច្រកសមុទ្រអង់គ្លេស គឺជាផ្លូវនាវាចរណ៍ដ៏មមាញឹក និងគ្រោះថ្នាក់បំផុតមួយ ដែលបានឆក់យកជីវិតជនចំណាកស្រុកជាច្រើននាក់ ខណៈបញ្ហានេះនៅតែជាវិបត្តិនយោបាយដ៏ក្តៅគគុកមួយនៅអឺរ៉ុប៕