(កៀវ)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានប្រកាសនៅថ្ងៃសុក្រនេះថា យន្តហោះដ្រូនគ្មានមនុស្សបើករបស់រុស្ស៉ី បានវាយប្រហារចំទីស្នាក់ការកណ្តាលនៃទីភ្នាក់ងារសេវាសន្តិសុខអ៊ុយក្រែន (SBU) នៅក្នុងរដ្ឋធានីកៀវ ខណៈដែលទីក្រុងមូស្គូបានបន្តការវាយប្រហារតាមអាកាសឥតឈប់ឈរលើរដ្ឋធានីនេះអស់រយៈពេល ១០ថ្ងៃជាប់ៗគ្នា។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ផ្សែងខ្មៅយ៉ាងក្រាស់ឃ្មឹកបានហុយទ្រលោមឡើងនៅចំកណ្តាលរដ្ឋធានីកៀវ បន្ទាប់ពីការវាយប្រហារនេះ ដែលជាសញ្ញានៃការបង្កើនកម្តៅថ្មីមួយទៀតនៃជម្លោះ។ អភិបាលក្រុងកៀវបានឱ្យដឹងថាមនុស្សយ៉ាងហោចណាស់ ៧នាក់បានរងរបួស។ តាមរយៈបណ្តាញ Telegram លោក ហ្សេលេនស្គី បានគូសបញ្ជាក់ដូច្នេះថា «ដ្រូននេះត្រូវបានកំណត់គោលដៅដោយផ្ទាល់លើការិយាល័យរបស់ប្រមុខទីភ្នាក់ងារសន្តិសុខនៅក្នុងអគារនោះ... ខ្ញុំបានបញ្ជាឱ្យរៀបចំការឆ្លើយតបយ៉ាងសមស្រប និងជាក់ស្តែង ហើយប្រសិនបើអាចធ្វើទៅបាន គឺត្រូវវាយបកដូចគ្នាបេះបិទទៅលើកងទ័ពរុស្ស៉ី នៅពេលដែលអ្វីៗត្រូវបានរៀបចំរួចរាល់»។

ទីតាំងកើតហេតុស្ថិតនៅក្នុងតំបន់ប្រវត្តិសាស្ត្រនៃទីក្រុង ក្បែរវិហារ Saint Sophia ដែលជាសម្បត្តិបេតិកភណ្ឌពិភពលោករបស់អង្គការយូណេស្កូ (UNESCO)។ នៅក្នុងរយៈពេលជាង ៤ឆ្នាំកន្លះនៃសង្គ្រាម អគាររដ្ឋាភិបាលអ៊ុយក្រែនកម្ររងការខូចខាតដោយសារការវាយប្រហារដោយដ្រូន ឬមីស៊ីលបែបនេះណាស់។

គួរបញ្ជាក់ថា ទីភ្នាក់ងារសន្តិសុខ SBU គឺជាស្ថាប័នសម្ងាត់ដ៏មានឥទ្ធិពលបំផុតរបស់អ៊ុយក្រែន ដែលទទួលខុសត្រូវលើប្រតិបត្តិការយោធាសំខាន់ៗជាច្រើនប្រឆាំងនឹងរុស្ស៉ី រួមទាំងការបំផ្ទុះស្ពានគ្រីមៀកាលពីឆ្នាំ២០២២ និងការវាយប្រហារលើមូលដ្ឋានយន្តហោះទម្លាក់គ្រាប់បែកយុទ្ធសាស្ត្ររបស់រុស្ស៉ីកាលពីឆ្នាំ២០២៥ ផងដែរ៕