(កៀវ)៖ ប្រេសិតសន្តិភាពសហរដ្ឋអាមេរិក លោក Jared Kushner និងលោក Steve Witkoff បានជួបពិភាក្សាការងារជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី នៅរដ្ឋធានីកៀវ កាលពីថ្ងៃអាទិត្យនេះ ខណៈដែលរដ្ឋបាលរបស់លោក ដូណាល់ ត្រាំ បានបង្កើនកិច្ចខិតខំប្រឹងប្រែងជាថ្មី ដើម្បីបញ្ចប់សង្គ្រាមរយៈពេលជាង ៤ឆ្នាំកន្លះរបស់រុស្ស៉ីនៅអ៊ុយក្រែន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអាទិត្យ ទី៦ ខែកញ្ញា ឆ្នាំ២០២៦។

ប្រេសិតអាមេរិកទាំងពីររូបបានធ្វើដំណើរមកដល់រដ្ឋធានីកៀវ បន្ទាប់ពីបានចំណាយពេលជួបពិភាក្សារយៈពេល ៣ម៉ោង ជាមួយប្រធានាធិបតីរុស្ស៉ី លោក វ្ល៉ាឌីមៀ ពូទីន នៅទីក្រុងមូស្គូ កាលពីថ្ងៃសៅរ៍កន្លងទៅ។ លោក ពូទីន បានពណ៌នាជំនួបនោះថា «មានប្រយោជន៍យ៉ាងខ្លាំង» ខណៈដែលមន្ត្រីសេតវិមានបានបញ្ជាក់ថា ជំហានបន្ទាប់នៃការជំរុញសន្តិភាពនឹងត្រូវប្រកាសនៅក្នុងប៉ុន្មានសប្តាហ៍ខាងមុខនេះ។

មុនពេលជំនួបចាប់ផ្តើម លោកប្រធានាធិបតី ហ្សេលេនស្គី បានគូសបញ្ជាក់នៅលើបណ្តាញសង្គមថា អ៊ុយក្រែនពិតជាចង់ឱ្យសង្គ្រាមនេះបញ្ចប់ ដោយលោកបានសង្កត់ធ្ងន់ថា «ការធានាសន្តិសុខគឺជារឿងចាំបាច់។ សន្តិភាពក្រោយសង្គ្រាមប្រកបដោយសេចក្តីថ្លៃថ្នូរ គឺជារឿងចាំបាច់។ សំណើរបស់យើងត្រូវបានរៀបចំរួចរាល់ហើយ»។ ទន្ទឹមនឹងនេះ ប្រភពដែលដឹងពីរឿងនេះបានទម្លាយឱ្យដឹងផងដែរថា ទីប្រឹក្សាសន្តិសុខជាតិនៃប្រទេសព្រីតថេន បារាំង និងអាល្លឺម៉ង់ ក៏បានធ្វើដំណើរទៅដល់រដ្ឋធានីកៀវកាលពីថ្ងៃអាទិត្យដូចគ្នាដែរ។

គួរបញ្ជាក់ថា កិច្ចចរចាសន្តិភាពកន្លងមកដែលសម្របសម្រួលដោយសហរដ្ឋអាមេរិក មិនទាន់ទទួលបានលទ្ធផលជាក់ស្តែងណាមួយនៅឡើយទេ ខណៈដែលលោក ដូណាល់ ត្រាំ បានបង្ហើបកាលពីថ្ងៃសុក្រថាសហរដ្ឋអាមេរិកមានសំណើថ្មីមួយ ដើម្បីជំរុញឱ្យភាគីទាំងសងខាងឈានទៅរកកិច្ចព្រមព្រៀងបញ្ចប់ជម្លោះ៕