(កូប៉ិនហាក)៖ ប្រធានគណៈកម្មការអឺរ៉ុប លោកស្រី Ursula von der Leyen បានធ្វើដំណើរទៅកាន់កោះហ្គ្រីនឡែន (Greenland) នៅថ្ងៃអាទិត្យនេះ សម្រាប់ដំណើរទស្សនកិច្ចរយៈពេលពីរថ្ងៃ ក្នុងគោលបំណងបញ្ជាក់ជាថ្មីនូវការគាំទ្ររបស់សហភាពអឺរ៉ុប (EU) ចំពោះដែនដីស្វយ័តរបស់ដាណឺម៉ាកមួយនេះ ដែលប្រធានាធិបតីអាមេរិក លោក ដូណាល់ ត្រាំ ធ្លាប់បានបង្ហាញបំណងចង់គ្រប់គ្រង។ នេះបើតាមការចេញផ្សាយនៅថ្ងៃអាទិត្យ ទី៦ ខែកញ្ញា ឆ្នាំ២០២៦។

នៅក្នុងដំណើរទស្សនកិច្ចនេះ លោកស្រី von der Leyen គ្រោងនឹងចុះហត្ថលេខាលើសេចក្តីប្រកាសរួមរវាងសហភាពអឺរ៉ុប និងកោះហ្គ្រីនឡែន។ យោងតាមកាសែត Financial Times លោកស្រីត្រូវបានរំពឹងថានឹងស្នើឡើងនូវកញ្ចប់ថវិកាគាំទ្របន្ថែមចំនួន ២០០លានអឺរ៉ូ ខណៈដែលទីក្រុងព្រុចសែលក៏បានស្នើដំឡើងជំនួយផ្ទាល់ទ្វេដងរហូតដល់ ៥៣០លានអឺរ៉ូ (ប្រមាណ ៦១៦លានដុល្លារអាមេរិក) សម្រាប់ដែនដីមួយនេះ នៅក្នុងកញ្ចប់ថវិកាឆ្នាំ២០២៨-២០៣៤ ខាងមុខ។

អ្នកស្រាវជ្រាវនៃមហាវិទ្យាល័យការពារជាតិដាណឺម៉ាក លោក Marc Jacobsen បានប្រាប់ AFP ថា «កោះហ្គ្រីនឡែន កាន់តែមានសារៈសំខាន់ខ្លាំងឡើងសម្រាប់សហភាពអឺរ៉ុប ក្នុងនាមជាច្រកទ្វារទៅកាន់តំបន់អាក់ទិក ដោយសារតែទីតាំងភូមិសាស្ត្រនយោបាយ ធនធានរ៉ែសំខាន់ៗ និងតួនាទីក្នុងសន្តិសុខតំបន់អាក់ទិក»។ លោកបានបន្ថែមថា ទោះបីជា EU មិនអាចផ្តល់ការធានាសន្តិសុខយោធាដូចអង្គការណាតូ (NATO) ក៏ដោយ ប៉ុន្តែដំណើរទស្សនកិច្ចនេះផ្តល់នូវសញ្ញានយោបាយយ៉ាងច្បាស់ថា «ហ្គ្រីនឡែន មិនឯកោឡើយ»។

គួរបញ្ជាក់ថា ដំណើរទស្សនកិច្ចរបស់ប្រមុខ EU ធ្វើឡើងស្របពេលគ្នានឹងការចាប់ផ្តើមសមយុទ្ធយោធា Arctic Shield របស់អង្គការណាតូ ដែលប្រមូលផ្តុំកងទ័ពមកពី ១០ប្រទេស បន្ទាប់ពីរដ្ឋបាលលោក ដូណាល់ ត្រាំ បានចោទប្រកាន់ដាណឺម៉ាកម្តងហើយម្តងទៀតថាបានធ្វេសប្រហែសលើសន្តិសុខនៅតំបន់អាក់ទិក ខណៈដែលលោក ត្រាំ ធ្លាប់បានលើកឡើងពីបំណងចង់គ្រប់គ្រងកោះដ៏ធំមួយនេះកាលពីដើមឆ្នាំកន្លងទៅ៕