(តេហេរ៉ង់)៖ អ្នកនាំពាក្យរដ្ឋាភិបាលអ៉ីរ៉ង់ បានឱ្យដឹងថា ប្រទេសអ៉ីរ៉ង់នឹងដំឡើងថ្លៃប្រេងសាំង សម្រាប់អ្នកប្រើប្រាស់ក្នុងកម្រិតលើសពី ១១០លីត្រក្នុងមួយខែ ដោយចាប់ផ្តើមអនុវត្តពីថ្ងៃអង្គារតទៅ ខណៈដែលប្រទេសនេះកំពុងបង្កើនកិច្ចខិតខំប្រឹងប្រែង ដើម្បីដោះស្រាយបញ្ហាបង្កឡើងដោយសង្គ្រាម និងការដាក់ទណ្ឌកម្មសេដ្ឋកិច្ចធ្ងន់ធ្ងរពីសំណាក់សហរដ្ឋអាមេរិក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃចន្ទ ទី៧ ខែកញ្ញា ឆ្នាំ២០២៦។

លោកស្រី Fatemeh Mohajerani បានលើកឡើងថា តម្លៃសម្រាប់កូតាទី១ និងទី២ ដែលរួមបញ្ចូលបរិមាណសាំង ១១០លីត្រ នឹងនៅដដែល ប៉ុន្តែតម្លៃសម្រាប់កូតាទី៣ នឹងត្រូវដំឡើងដល់ ១០០ ០០០រៀលអ៉ីរ៉ង់ក្នុងមួយលីត្រ ឬប្រហែល ៤សេនដុល្លារអាមេរិក ផ្អែកលើអត្រាប្តូរប្រាក់ទីផ្សារសេរី។ លោកស្រី Mohajerani ពន្យល់ថា ការឡើងថ្លៃនេះប៉ះពាល់ចំពោះតែអ្នកប្រើប្រាស់លើសពី ១១០លីត្រក្នុងមួយខែប៉ុណ្ណោះ ហើយអ្នកបើកបរយានយន្តផ្សេងទៀត នៅតែអាចទិញប្រេងបានរហូតដល់ ៦០លីត្រ នៅក្នុងតម្លៃមួយលីត្រ ១៥ ០០០រៀល និងអាចទិញបន្ថែម ៥០លីត្រទៀត នៅក្នុងតម្លៃ ៣០ ០០០រៀលក្នុងមួយលីត្រ។

គួរបញ្ជាក់ថា ការដំឡើងថ្លៃប្រេងសាំងនៅអ៉ីរ៉ង់ ជាទីដែលប្រេងមានតម្លៃទាបបំផុតលើពិភពលោក ត្រូវបានលើកយកមកពិភាក្សាយូរមកហើយ ប៉ុន្តែការអនុវត្តត្រូវពន្យារពេល ដោយសារក្តីបារម្ភថាវាអាចបង្កឱ្យមានការតវ៉ាថ្មីៗ។ កាលពីឆ្នាំ២០១៩ អ៉ីរ៉ង់ធ្លាប់ជួបប្រទះនឹងការតវ៉ាទ្រង់ទ្រាយធំជុំវិញបញ្ហានេះ៕