(Reuters)៖ នៅថ្ងៃចន្ទ ទី៧ ខែកញ្ញា តម្លៃប្រេងឆៅបន្តកើនឡើងតិចតួចទៀត ខណៈការវាយប្រហារតបតគ្នាទៅវិញទៅមករវាងសហរដ្ឋអាមេរិក និងអ៉ីរ៉ង់ លើនាវាដែលធ្វើដំណើរក្នុងច្រកសមុទ្រ Hormuz និងតំបន់ផ្សេងទៀត បានបង្កើនក្តីបារម្ភថាការរំខានដល់ការផ្គត់ផ្គង់ប្រេងពីមជ្ឈិមបូព៌ា អាចអូសបន្លាយពេល។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

តម្លៃប្រេងឆៅប្រភេទ Brent កើន ៥២សេន ឬ ០,៥៤ភាគរយ ដល់តម្លៃ ៩៦,៨០ដុល្លារក្នុងមួយបារ៉ែល ខណៈតម្លៃប្រេងឆៅ West Texas Intermediate (WTI) របស់សហរដ្ឋអាមេរិក ស្ថិតនៅកម្រិត ៩២,១៤ដុល្លារក្នុងមួយបារ៉ែល ពោលគឺកើនឡើង ៦៦សេន ឬ ០,៧២ភាគរយ។ គ្រាន់តែនៅក្នុងសប្តាហ៍មុន តម្លៃប្រេងឆៅ Brent បានកើនឡើង ៧,៨ភាគរយ ខណៈដែលតម្លៃប្រេង WTI កើនឡើងជិត ១០ភាគរយឯណោះ បន្ទាប់ពីសហរដ្ឋអាមេរិក និងអ៉ីរ៉ង់បានបន្តការវាយប្រហារគ្នាឡើងវិញ ដែលបាននាំឱ្យលំហូរប្រេងឆ្លងកាត់ច្រកសមុទ្រ Hormuz ថយចុះ។

ទិន្នន័យពីក្រុមហ៊ុនវិភាគ Kpler បានបង្ហាញនៅថ្ងៃចន្ទនេះ ថាជាមធ្យមមាននាវាដឹកទំនិញចំនួន ១០គ្រឿងបានធ្វើដំណើរឆ្លងកាត់ច្រកសមុទ្រ Hormuz ក្នុងមួយថ្ងៃៗអំឡុងរយៈពេល ១០ថ្ងៃកន្លងមក ដែលនេះគឺជាកម្រិតទាបបំផុតគិតចាប់តាំងពីខែឧសភា។ អ្នកវិភាគរបស់ធនាគារ ANZ បានលើកឡើងថា ស្ថានភាពប្រឈមមុខដាក់គ្នាយូរអង្វែង អមដោយការធ្វើសកម្មភាពយោធាយ៉ាងប្រុងប្រយ័ត្ន ពីសំណាក់សហរដ្ឋអាមេរិក និងអ៉ីរ៉ង់ ហាក់ដូចជាសេណារីយ៉ូដែលអាចទៅរួច ហើយវាទំនងជានឹងពន្យឺតពេលងើបឡើងវិញ នៃប្រព័ន្ធផ្គត់ផ្គង់ថាមពលក្នុងតំបន់មជ្ឈិមបូព៌ា៕