(វ៉ាស៊ីនតោន)៖ ការផ្លាស់ប្តូរឈ្មោះជាបន្តបន្ទាប់របស់ប្រធានាធិបតីអាមេរិក លោក ដូណាល់ ត្រាំ នាពេលនេះ បានរកឃើញគោលដៅថ្មីមួយទៀតហើយ កាលពីថ្ងៃអាទិត្យ ទី៦ ខែកញ្ញា ឆ្នាំ២០២៦ នៅពេលដែលលោកបានលើកឡើង អំពីបំណងចង់ប្តូរឈ្មោះរដ្ឋ New Mexico របស់សហរដ្ឋអាមេរិក ទៅជា New America វិញ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ការលើកឡើងបែបនោះ ត្រូវបានអភិបាលរដ្ឋ New Mexico ច្រានចោលភ្លាមៗ ហើយវាកើតមានត្រឹមប៉ុន្មានថ្ងៃប៉ុណ្ណោះ បន្ទាប់ពីលោកបានចុះហត្ថលេខាលើបទបញ្ជាប្តូរឈ្មោះបឹង Ontario ទៅជាបឹង America នៅចំពេលមានសង្គ្រាមពាណិជ្ជកម្ម ជាមួយកាណាដាដែលជាប្រទេសជិតខាង។

លោកប្រធានាធិបតីអាមេរិកមកពីបក្សសាធារណរដ្ឋរូបនេះ បានបង្ហោះលើបណ្តាញសង្គមយ៉ាងដូច្នេះថា «មានមនុស្សជាច្រើន បានស្នើចង់ឱ្យប្តូរឈ្មោះ New Mexico ទៅជា NEW AMERICA។ «វាពិតជាមានកិត្យានុភាព ហើយស្រស់ស្អាតឆ្ងាយជាង សម្រាប់ប្រជាជននៃរដ្ឋដ៏អស្ចារ្យនេះ។ ខ្ញុំពេញឈ្មោះនេះខ្លាំងណាស់!»។ បន្ទាប់មក សេតវិមាន បានបង្ហោះរូបភាពមួយ ដែលបង្ហាញពាក្យ Mexico នៃឈ្មោះរដ្ឋ New Mexico ត្រូវបានគូសឆូតចោល និងជំនួសដោយពាក្យ America។

អភិបាលរដ្ឋ New Mexico លោកស្រី Michelle Lujan Grisham បានប្រព័ន្ធផ្សព្វផ្សាយក្នុងស្រុកយ៉ាងដូច្នេះថា «ឈ្មោះនេះ គឺគ្មានអ្វីត្រូវពិភាក្សាឬជជែកវែកញែកឡើយ។ វាជារបស់យើងតាំងពីមុនសហររដ្ឋអាមេរិកត្រូវបានបង្កើតឡើងមកម្ល៉េះ»។ លោកស្រីបានបន្តថា តាមពិតទៅ លោកប្រធានាធិបតីកំពុងចង់បង្វែរចំណាប់អារម្មណ៍ពលរដ្ឋអាមេរិក ចេញពីបញ្ហាសំខាន់ៗ ដូចជាការឡើងថ្លៃខ្ពស់នៃប្រេងឥន្ធនៈ ជាដើម។

គួរបញ្ជាក់ថា កាលពីសប្តាហ៍មុន លោក ត្រាំ បានស្នើចង់ប្តូរឈ្មោះច្រកសមុទ្រ Hormuz ទៅជាច្រកសមុទ្រ Trump ខណៈដែលសង្រ្គាមជាមួយប្រទេសអ៉ីរ៉ង់នៅតែបន្តអូសបន្លាយ ប៉ុន្តែប៉ុន្មានម៉ោងក្រោយមក លោកបានគូសបញ្ជាក់វិញថា លោកគ្រាន់តែលេងសើចប៉ុណ្ណោះ។ លោក ត្រាំ បានប្តូរឈ្មោះឈូងសមុទ្រម៉ិកស៊ិក (Gulf of Mexico) ទៅជា ឈូងសមុទ្រអាមេរិក (Gulf of America) នៅថ្ងៃដំបូងដែលលោកត្រឡប់មកកាន់អំណាចនៅសេតវិមានវិញ កាលពីក្នុងឆ្នាំ ២០២៥ ដែលជាការផ្លាស់ប្តូរ ត្រូវបានប្រទេសម៉ិកស៊ិកបដិសេធ។ រីឯកាណាដា ក៏បានទាត់ចោលការប៉ុនប៉ងប្តូរឈ្មោះបឹង Ontario ផងដែរ៕