(ហ្សឺណែវ)៖ ទីភ្នាក់ងារឧតុនិយមពិភពលោក (WMO) នៃអង្គការសហប្រជាជាតិ បានឱ្យដឹងថា ការបំពុលដែលបណ្តាលមកពីភ្លើងឆេះព្រៃធ្ងន់ធ្ងរ និងរលកកម្ដៅខ្លាំង អាចធ្វើឱ្យប៉ះពាល់ដល់កិច្ចខិតខំប្រឹងប្រែងជាសកល ក្នុងការកែលម្អគុណភាពខ្យល់ និងការពារសុខភាពមនុស្ស ព្រមទាំងបានព្រមានថាកត្តាប្រែប្រួលអាកាសធាតុ នឹងធ្វើឱ្យការសម្រេចគោលដៅអន្តរជាតិស្តីពីគុណភាពខ្យល់ ជួបការលំបាកថែមទៀត។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃចន្ទ ទី៧ ខែកញ្ញា ឆ្នាំ២០២៦។

ក្នុងរបាយការណ៍ប្រចាំឆ្នាំស្តីពីគុណភាពខ្យល់ និងអាកាសធាតុ WMO បានលើកឡើងថាការបំពុលខ្យល់ និងការប្រែប្រួលអាកាសធាតុ មានជាប់ទាក់ទងយ៉ាងជិតដិត ហើយវាគួរតែត្រូវបានដោះស្រាយតាមរយៈគោលនយោបាយ ដែលមានលក្ខណៈសម្របសម្រួលគ្នា ជាជាងការដោះស្រាយដាច់ដោយឡែក។ WMO ព្រមានថា ការសម្រេចបាននូវគោលការណ៍ណែនាំរបស់អង្គការសុខភាពពិភពលោក (WHO) ស្តីពីគុណភាពខ្យល់នឹងកាន់តែជួបការលំបាក ដោយសារតែគ្រោះអគ្គិភ័យឆេះព្រៃកម្រិតធ្ងន់ ទំនងជានឹងកើតឡើងកាន់តែញឹកញាប់ នាពេលអនាគត។

WMO បញ្ជាក់ថាភ្លើងឆេះព្រៃ កំពុងក្លាយជាប្រភពធំមួយនៃការបំពុលខ្យល់ដែលបង្កគ្រោះថ្នាក់ ទោះបីជាមានការដាក់ចេញនូវបទប្បញ្ញត្តិនានា ដើម្បីកាត់បន្ថយការបញ្ចេញឧស្ម័នពីវិស័យឧស្សាហកម្ម និងការដឹកជញ្ជូននៅក្នុងប្រទេសអភិវឌ្ឍជាច្រើនក៏ដោយ។ ផលប៉ះពាល់ពីភាគល្អិតតូចៗ ដែលគេស្គាល់ថា PM2.5 និងលម្អងធូលីដែលមានសារធាតុបំពុល អាចនាំទៅរកជំងឺផ្លូវដង្ហើម និងជំងឺបេះដូង។

គួរបញ្ជាក់ថា ២០២៦ ត្រូវបានកត់សម្គាល់ថាជាឆ្នាំដ៏ក្តៅ និងមានភ្លើងឆេះព្រៃបង្កការខូចខាតធ្ងន់ធ្ងរ នៅតំបន់មួយចំនួន នៃទ្វីបអឺរ៉ុប។ តាម WMO លក្ខខណ្ឌអាកាសធាតុក្តៅកំពុងកើតឡើងញឹកញាប់ជាងមុន និងមានឥទ្ធិពលខ្លាំង ហើយអូសបន្លាយពេលយូរ ខណៈភពផែនដីកំពុងឡើងកម្ដៅ៕