លោក Wang Yi ថ្លែងអំពីសមិទ្ធផលនៃការចូលរួមកិច្ចប្រជុំកំពូលអង្គការសហប្រតិបត្តិការសៀងហៃឆ្នាំ ២០២៦ និងការបំពេញទស្សនកិច្ចផ្លូវរដ្ឋនៅប្រទេសកៀហ្ស៊ីស៊ីស្ថាន និងអេហ្ស៊ីបរបស់លោក Xi Jinping ប្រធានរដ្ឋចិន
07-09-2026 16:43
(ប៉េកាំង)៖ ចាប់ពីថ្ងៃទី ៣០ ខែសីហា ដល់ថ្ងៃទី ៣ ខែកញ្ញា ឆ្នាំ ២០២៦ លោក Xi Jinping ប្រធានរដ្ឋចិនបានចូលរួមកិច្ចប្រជុំកំពូលអង្គការសហប្រតិបត្តិការសៀងហៃឆ្នាំ ២០២៦ និងបំពេញទស្សនកិច្ចផ្លូវរដ្ឋនៅប្រទេសកៀហ្ស៊ីស៊ីស្ថាន និងអេហ្ស៊ីបតាមការអញ្ជើញ។
នៅពេលបញ្ចប់ ដំណើរទស្សនកិច្ចទាំងស្រុង លោក Wang Yi សមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនីស្តចិននិងជារដ្ឋមន្ត្រីក្រសួងការបរទេសចិន បានថ្លែងអំពីសភាពការណ៍នៃដំណើរទស្សនកិច្ចលើកនេះប្រាប់អ្នកសារព័ត៌មានអមដំណើរ។
លោក Wang Yi បានថ្លែងថា លោក Xi Jinping បានបំពេញទស្សនកិច្ចទៅកាន់អាស៊ីកណ្តាល និងមជ្ឈិមបូព៌ាក្នុងបវិបទដែលប្រឈមមុខនឹងស្ថានការណ៍អន្តរជាតិដ៏ស្មុគស្មាញ និងប្រែប្រួលខ្លាំង។ ដំណើរទស្សនកិច្ចលើកនេះ ផ្តោតលើការរួមសុខរួមទុក្ខ និងផ្តួចផ្តើមឱ្យមានភាពសច្ចយុត្តិធម៌ ដែលមានសារៈសំខាន់និងមានអត្ថន័យដ៏វែងឆ្ងាយក្នុងការប្រមូលផ្តុំគំនិតឯកភាពរួមរបស់គ្រប់ភាគីពាក់ព័ន្ធអំពីកិច្ចសហប្រតិបត្តិការ ព្រមនិងធ្វើកំណែទម្រង់និងកែលម្អអភិបាលកិច្ចសកល។
ក្នុងរយៈពេលបួនយប់ប្រាំថ្ងៃ លោក Xi Jinping បានចូលរួមព្រឹត្តិការណ៍ជាង ២០ លើក និងទទួលបានលទ្ធផលជាផ្លែផ្កាយ៉ាងច្រើន។ ប្រព័ន្ធផ្សព្វផ្សាយជាតិ និងអន្តរជាតិបានយកចិត្តទុកដាក់ខ្ពស់ចំពោះករណីនេះ និងកត់សម្គាល់ថា ក្នុងបរិបទដែលភូមិសាស្ត្រនយោបាយមានភាពប្រេះស្រាំកាន់តែស៊ីជម្រៅ ហើយសណ្តាប់ធ្នាប់អន្តរជាតិរងផលប៉ះពាល់យ៉ាងខ្លាំងដំណើរទស្សនកិច្ចរបស់លោកXi Jinping លើកនេះបានឆ្លើយតបយ៉ាងមានប្រសិទ្ធភាពចំពោះការរំពឹងទុក របស់សហគមន៍អន្តរជាតិចំពោះសន្តិភាព ស្ថិរភាព និងការអភិវឌ្ឍ ព្រមទាំងផ្តល់នូវដំណោះស្រាយ និងតម្រិះប្រាជ្ញាចិនសម្រាប់ឆ្លើយតបនឹងបម្រែបម្រួលនិងភាពស្មុគស្មាញនៃពិភពលោក៕
វិទ្យុមិត្តភាពកម្ពុជាចិន
