(វីយែន)៖ ប្រមុខទីភ្នាក់ងារថាមពលបរមាណូអន្តរជាតិ (IAEA) លោក Rafael Grossi បានឱ្យដឹងនៅថ្ងៃចន្ទនេះថា ប្រទេសអារ៉ាប៊ីសាអូឌីតកំពុងត្រៀមផ្តល់សិទ្ធិអំណាចត្រួតពិនិត្យ និងតាមដានកាន់តែទូលំទូលាយដល់ IAEA ក្រោមកិច្ចព្រមព្រៀងនុយក្លេអ៊ែរជាមួយសហរដ្ឋអាមេរិក បើទោះបីជាមិនបានចុះហត្ថលេខាលើពិធីសារបន្ថែមក៏ដោយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

កាលពីខែកក្កដាកន្លងទៅ សហរដ្ឋអាមេរិក និងអារ៉ាប៊ីសាអូឌីត បានសម្រេចកិច្ចព្រមព្រៀងនុយក្លេអ៊ែរស៊ីវិល ដែលអនុញ្ញាតឱ្យទីក្រុងរីយ៉ាដអាចចម្រាញ់សារធាតុអ៊ុយរ៉ាញ៉ូម និងសាងសង់រ៉េអាក់ទ័រដោយប្រើបច្ចេកវិទ្យារបស់អាមេរិក។ លោក Grossi បានបញ្ជាក់ថា តាមរយៈការពិភាក្សា ភាគីទាំងពីរបានយល់ព្រមដាក់បញ្ចូលនូវលក្ខខណ្ឌមួយចំនួនដែលផ្តល់សិទ្ធិឱ្យ IAEA អាចតាមដានយ៉ាងដិតដល់លើសកម្មភាពរសើបៗ ដូចជាការចម្រាញ់អ៊ុយរ៉ាញ៉ូម និងការកែច្នៃកាកសំណល់ឥន្ធនៈនុយក្លេអ៊ែរ។

គួរបញ្ជាក់ថា នៅពេលដែលសេចក្តីលម្អិតត្រូវបានរៀបចំរួចរាល់ កិច្ចព្រមព្រៀងទ្វេភាគីរវាង IAEA និងអារ៉ាប៊ីសាអូឌីត នឹងត្រូវដាក់ជូនក្រុមប្រឹក្សាភិបាល ៣៥ប្រទេសរបស់ IAEA ដើម្បីពិនិត្យ និងអនុម័តជាផ្លូវការ៕