(ហ្ស៊េរុយសាឡិម)៖ យោធាអ៉ីស្រាអែល នៅថ្ងៃចន្ទ ទី៧ ខែកញ្ញា ឆ្នាំ២០២៦ បាននិយាយថាខ្លួននៅតែមានការប្ដេជ្ញាចិត្តចំពោះបទឈប់បាញ់ ប៉ុន្តែនឹងបន្តលុបបំបាត់ការគំរាមកំហែងពីក្រុមហេសបូឡា បន្ទាប់ពីក្រសួងសុខាភិបាលលីបង់រាយការណ៍ថាមានមនុស្ស ១២នាក់ត្រូវបានសម្លាប់ក្នុងការវាយប្រហាររបស់អ៉ីស្រាអែល។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

យោធាអ៉ីស្រាអែលបានឱ្យដឹងទៀតថាខ្លួនបានវាយប្រហារលើហេដ្ឋារចនាសម្ព័ន្ធរបស់ហេសបូឡា នៅទូទាំងតំបន់ភាគខាងត្បូងលីបង់ ជាការឆ្លើយតបទៅនឹងការបាញ់ដ្រូនបំពាក់គ្រឿងផ្ទុះ ២គ្រឿងតម្រង់រកទាហានអ៉ីស្រាអែល។ នៅក្នុងសេចក្ដីថ្លែងការណ៍ដាច់ដោយឡែកមួយ យោធាអ៉ីស្រាអែលក៏បានអះអាងដែរថាបានសម្លាប់សមាជិកម្នាក់របស់ហេសបូឡាក្នុងតំបន់ Beaufort ដែលបានបាញ់ប្រហារលើទាហានអ៉ីស្រាអែលចេញពីខាងក្នុងអគារមួយ ហើយនៅក្នុងការវាយប្រយុទ្ធគ្នានេះ ទាហានអ៉ីស្រាអែល២នាក់បានរងរបួសស្រាល។

តាមសេចក្ដីថ្លែងការណ៍ដដែល យោធាអ៉ីស្រាអែលបានគូសបញ្ជាក់ដូច្នេះថា «ការអះអាងដែលថាមានជនស៊ីវិលជាច្រើននាក់ស្លាប់ និងរងរបួសក្នុងការវាយប្រហារកំពុងស្ថិតនៅក្រោមការត្រួតពិនិត្យ។ ប៉ុន្តែយោធាអ៉ីស្រាអែលនឹងបន្តធ្វើប្រតិបត្តិការដើម្បីលុបបំបាត់ការគំរាមកំហែង ខណៈបន្តប្ដេជ្ញាចិត្តចំពោះកិច្ចព្រមព្រៀងបទឈប់បាញ់»។

លីបង់បានធ្លាក់ចូលក្នុងសង្រ្គាម កាលពីខែមីនាកន្លងទៅ បន្ទាប់ពីក្រុមហេសបូឡាបានបើកការវាយប្រហារលើអ៉ីស្រាអែល ជាការបង្ហាញការគាំទ្រដល់អ៉ីរ៉ង់ជាសម្ព័ន្ធមិត្តដែលរងការវាយប្រហារពីសហរដ្ឋអាមេរិក និងអ៉ីស្រាអែលកាលពីចុងខែកុម្ភៈ។ អ៉ីស្រាអែលបានសងសឹកវិញ ដោយទម្លាក់គ្រាប់បែក និងធ្វើប្រតិបត្តិការយោធាថ្មើរជើងប្រឆាំងលីបង់ដែលបានសម្លាប់មនុស្សជាង ៤៣០០នាក់។ នេះបើតាមអាជ្ញាធរលីបង់។

អំពើហិង្សានៅលីបង់បានថមថយ ចាប់តាំងពីមានអនុស្សារណយោគយល់មួយរវាងសហរដ្ឋអាមេរិក និងអ៉ីរ៉ង់កាលពីខែមិថុនា រួមទាំងកិច្ចព្រមព្រៀងក្របខណ្ឌរវាងអ៉ីស្រាអែល និងលីបង់ កាលពីចុងខែមិថុនា។ ក៏ប៉ុន្តែ ការវាយប្រយុទ្ធគ្នារវាងអ៉ីស្រាអែល និងហេសបូឡា នៅតែបន្តកើតមាន ដោយអ៉ីស្រាអែលកំពុងធ្វើប្រតិបត្តិការក្នុងតំបន់មួយដែលខ្លួនហៅថា «តំបន់សន្តិសុខ» ស្ថិតនៅចម្ងាយ ១០គីឡូម៉ែត្រចូលជ្រៅក្នុងទឹកដីលីបង់ពីព្រំដែនអ៉ីស្រាអែល។

គួរបញ្ជាក់ថា កាលពីថ្ងៃអាទិត្យចុងសប្ដាហ៍កន្លងទៅ ប្រធានាធិបតីលីបង់ លោក Joseph Aoun បានជំរុញឱ្យសហរដ្ឋអាមរិក និងសហគមន៍អន្តរជាតិជួយបញ្ឈប់ការវាយប្រហាររបស់ អ៉ីស្រាអែល ខណៈកិច្ចចរចាថ្មីមួយត្រូវបានរំពឹងថានឹងធ្វើឡើងនៅក្នុងខែកញ្ញានេះ បើទោះជាក្រុមមន្ត្រីអ៉ីស្រាអែល និងលីបង់មិនទាន់បានបញ្ជាក់កាលបរិច្ឆេទក៏ដោយ៕