(Reuters)៖ តម្លៃប្រេងបានហក់ឡើងជាបន្តបន្ទាប់ក្នុងរយៈពេល ៤ថ្ងៃជាប់ៗគ្នា ដោយកើនជាង ១ដុល្លារទៀត នៅដើមវគ្គជួញដូរថ្ងៃពុធ ទី៩ ខែកញ្ញានេះ ក្រោយអ៉ីរ៉ង់បើកការវាយប្រហារថ្មីមួយទៀត ទៅលើគោលដៅយោធារបស់សហរដ្ឋអាមេរិក នៅក្នុងប្រទេសតំបន់ឈូងសមុទ្រ ខណៈដែលជម្លោះរវាងទីក្រុងវ៉ាស៉ីនតោន និងទីក្រុងតេហេរ៉ង់ រាលដាលពាសពេញតំបន់សារជាថ្មី។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

ប្រេងឆៅប្រភេទ Brent មានតម្លៃ ៩៩,៤៩ដុល្លារក្នុងមួយបារ៉ែល។ ចំណែកប្រេងឆៅអាមេរិកប្រភេទ West Texas Intermediate មានតម្លៃ ៩៤,៦៣ដុល្លារក្នុងមួយបារ៉ែល។ តម្លៃប្រេងឆៅ Brent បានកើនឡើង១ភាគ៤ ចាប់តាំងពីដើមខែសីហាមក នៅពេលដែលក្តីសង្ឃឹមសម្រាប់ដំណោះស្រាយជាអចិន្ត្រៃយ៍ចំពោះសង្គ្រាមដែលមានរយៈពេល ៦ខែមកនេះ បានរលាយបាត់ ហើយការប្រយុទ្ធគ្នាផ្ទុះឡើងវិញ។

គួរបញ្ជាក់ថា គិតត្រឹមថ្ងៃអង្គារសប្តាហ៍នេះ ក្រុមហ៊ូទីគាំទ្រដោយអ៉ីរ៉ង់ដែលមានមូលដ្ឋាននៅយេម៉ែន បានបើកការវាយប្រហារលើទីក្រុងជាច្រើនរបស់អារ៉ាប៊ីសាអូឌីត ដែលជាមួយសម្ព័ន្ធមិត្តរបស់សហរដ្ឋអាមេរិកក្នុងតំបន់ ស្របពេលកងកម្លាំងអាមេរិក វាយប្រហារលើនាវាដឹកប្រេងរបស់អ៉ីរ៉ង់ជាច្រើនគ្រឿង ហើយអ៉ីរ៉ង់ក៏បានកំណត់គោលដៅលើមូលដ្ឋានទ័ពអាមេរិកមួយកន្លែង នៅក្នុងប្រទេសហ្ស៊កដានី៕