(សេអ៊ូល)៖ នៅថ្ងៃពុធ ទី៩ ខែកញ្ញា ឆ្នាំ២០២៦ ប្រជាជនកូរ៉េខាងត្បូងជាច្រើននាក់ បានជំរុញឱ្យរដ្ឋាភិបាលរបស់ពួកគេ កុំបញ្ជូនកងទ័ពទៅកាន់ច្រកសមុទ្រ Hormuz ជាមួយការរិះគន់យ៉ាងខ្លាំងក្លាទៅលើអ្វីដែលពួកគេហៅថាជា «សង្គ្រាមខុសច្បាប់» របស់ទីក្រុងវ៉ាស៉ីនតោន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP។

ក្រុមអ្នកតវ៉ាដែលស្ថិតនៅទល់មុខបរិវេណស្ថានទូតអាមេរិក ក្នុងទីក្រុងសេអ៊ូល បានលើកបដាដែលមានសរសេរថា «កុំចូលរួមក្នុងសង្គ្រាមឈ្លានពាន» ខណៈថ្នាក់ដឹកនាំនៅកូរ៉េខាងត្បូង កំពុងពិចារណាលើការរួមចំណែកដល់សន្តិសុខនៃច្រកផ្លូវទឹកនោះ។
«យើងមិនអាចបញ្ជូនយុវជនរបស់យើងទៅកាន់ជ្រោះមរណៈឡើយ» នេះជាពាក្យស្លោកដែលក្រុមអ្នកតវ៉ាប្រមាណ ៦០នាក់ បានស្រែកឡើង នៅខាងក្រៅមជ្ឈមណ្ឌលសិល្បៈសម្តែង Sejong ក្នុងទីក្រុងសេអ៊ូល។

ការតវ៉ានេះបានកើតឡើងមួយថ្ងៃ បន្ទាប់ពីអាជ្ញាធរការពារជាតិកូរ៉េខាងត្បូង ប្រកាសពីការបញ្ជូនក្រុមការងារទៅស្វែងយល់ពីការពិត ដើម្បីវាយតម្លៃស្ថានភាពនៅតំបន់ច្រកសមុទ្រ Hormuz ប៉ុន្តែបានសង្កត់ធ្ងន់ថា មិនទាន់មានការសម្រេចចិត្តណាមួយត្រូវបានធ្វើឡើងទេ ពាក់ព័ន្ធការដាក់ពង្រាយកងកម្លាំង៕