(មូស្គូ)៖ វិមានក្រឹមឡាំងបានប្រកាសនៅថ្ងៃពុធនេះថា ប្រទេសរុស្ស៉ីនឹងមានការឆ្លើយតបសមស្របមួយ ចំពោះការសម្រេចចិត្តរបស់ហុងគ្រី ក្នុងការបណ្តេញអ្នកការទូតរុស្ស៉ីចំនួន ១០រូប ប៉ុន្តែទីក្រុងមូស្គូនៅតែបន្តបើកចំហចំពោះការអភិវឌ្ឍទំនាក់ទំនងទ្វេភាគី។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី៩ ខែកញ្ញា ឆ្នាំ២០២៦។

រដ្ឋាភិបាលថ្មីរបស់ហុងគ្រី ដឹកនាំដោយលោក Peter Magyar ដែលបានឡើងកាន់តំណែងជំនួសអតីតនាយករដ្ឋមន្ត្រីស្និទ្ធនឹងរុស្ស៉ី លោក Viktor Orban បានប្រកាសបណ្តេញអ្នកការទូតទាំងនោះ ដោយលើកឡើងថាពួកគេបានធ្វើសកម្មភាពមិនសមស្របនឹងឋានៈការទូតរបស់ខ្លួន។ អ្នកនាំពាក្យវិមានក្រឹមឡាំង លោក Dmitry Peskov បានគូសបញ្ជាក់ថា ទោះបីជាចំណាត់ការនេះជះឥទ្ធិពលអវិជ្ជមានក៏ដោយ ប៉ុន្តែរុស្ស៉ីនៅតែចង់រក្សា និងបន្តអភិវឌ្ឍកេរដំណែលនៃទំនាក់ទំនងជាប្រវត្តិសាស្ត្ររវាងប្រទេសទាំងពីរ។

គួរបញ្ជាក់ថា ការបណ្តេញអ្នកការទូតនេះ គឺជាការបង្ហាញយ៉ាងច្បាស់ពីការផ្លាស់ប្តូរគោលនយោបាយការបរទេសរបស់ហុងគ្រី ឆ្ពោះទៅរកជំហររឹងមាំរបស់លោកខាងលិច ក្រោយការផ្លាស់ប្តូរថ្នាក់ដឹកនាំថ្មីកាលពីខែមេសាកន្លងទៅ៕