(តេអាវីវ)៖ រដ្ឋមន្ត្រីការបរទេសអ៊ីស្រាអែល លោក ហ្គីឌៀន សា (Gideon Saar) នៅថ្ងៃពុធ បានប្រកាសថា រដ្ឋាភិបាលអ៊ីស្រាអែលមិនមានផែនការបណ្តេញប្រជាជនប៉ាឡេស្ទីនចេញពីតំបន់ហ្គាហ្សា (Gaza) នោះទេ។ ការបញ្ជាក់នេះធ្វើឡើង បន្ទាប់ពីរដ្ឋមន្ត្រីអ៊ីស្រាអែលពីររូប បានលើកឡើងពីសំណើបណ្តេញពលរដ្ឋប៉ាឡេស្ទីនទ្រង់ទ្រាយធំចេញពីតំបន់ឆ្នេរមួយនេះ កាលពីដើមខែ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ថ្លែងនៅក្នុងសន្និសីទសារព័ត៌មាននាទីក្រុងលូប៊្លីយ៉ាណា (Ljubljana) ប្រទេសស្លូវេនី (Slovenia) ក្នុងឱកាសបើកសម្ពោធស្ថានទូតអ៊ីស្រាអែល លោក សា បានសង្កត់ធ្ងន់ថា៖ «យើងមិនមានគម្រោងបណ្តេញ ឬនិរទេសនរណាម្នាក់ចេញពីតំបន់ហ្គាហ្សាស្ទ្រីបឡើយ។ ប្រសិនបើមាននរណាម្នាក់ចង់ធ្វើអន្តោប្រវេសន៍ដោយស្ម័គ្រចិត្ត ហើយមានប្រទេសដែលព្រមទទួលយកពួកគេ... យើងនឹងមិនជំទាស់ទេ ប៉ុន្តែយើងក៏នឹងមិនបង្ខិតបង្ខំនរណាម្នាក់ឱ្យចាកចេញផ្ទុយពីឆន្ទៈរបស់ពួកគេដែរ»។

គួររំលឹកថា កាលពីថ្ងៃទី០២ ខែកញ្ញា រដ្ឋមន្ត្រីការពារជាតិអ៊ីស្រាអែល លោក អ៊ីស្រាអែល កាត (Israel Katz) បានលើកឡើងថា «នៅទីបំផុត គ្មានដំណោះស្រាយពិតប្រាកដណាមួយសម្រាប់ហ្គាហ្សាទេ ប្រសិនបើគ្មានការធ្វើចំណាកស្រុក» របស់ពលរដ្ឋប៉ាឡេស្ទីន។ បន្ទាប់មក នៅថ្ងៃទី០៣ ខែកញ្ញា រដ្ឋមន្ត្រីសន្តិសុខស្តាំនិយមជ្រុល លោក អ៊ីតាម៉ា បេន ហ្គីវៀ (Itamar Ben-Gvir) ក៏បានគូសវាសផែនការរយៈពេល ៧ឆ្នាំ ដើម្បីជម្លៀសប្រជាជនហ្គាហ្សាចេញ តាមរយៈអ្វីដែលលោកហៅថាជា «ការធ្វើចំណាកស្រុកដោយស្ម័គ្រចិត្ត»៕