(ឌូនប៊ែក)៖ ប្រធានាធិបតីសហរដ្ឋអាមេរិក លោក ដូណាល់ ត្រាំ បានថ្លែងនៅថ្ងៃអាទិត្យនេះថា មាន «កម្លាំងអវិជ្ជមានជាច្រើន» កំពុងលើកឡើងពីការព្រួយបារម្ភបំផ្លើសហួសហេតុអំពីបច្ចេកវិទ្យាបញ្ញាសិប្បនិម្មិត (AI) ដែលជារឿងនឹងមិនអាចកើតឡើងនោះឡើយ ព្រមទាំងបានសង្កត់ធ្ងន់ថា លោកចង់ធានាឱ្យសហរដ្ឋអាមេរិកបន្តឈរនៅលំដាប់ជួរមុខលើវិស័យមួយនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ថ្លែងប្រាប់ក្រុមអ្នកសារព័ត៌មាននៅឯទីលានវាយកូនហ្គោលរបស់លោកក្នុងប្រទេសអៀរឡង់ នៅពេលត្រូវបានសួរថាតើឧស្សាហកម្ម AI គួរតែបន្ថយល្បឿន ឬត្រូវរឹតបន្តឹងបទប្បញ្ញត្តិដែរឬទេ លោក ត្រាំ បានគូសបញ្ជាក់ដូច្នេះថា «យើងកំពុងនាំមុខប្រទេសចិនលើវិស័យ AI។ យើងជាប្រទេសជឿនលឿនបំផុតនៅលើពិភពលោក ហើយតាមត្រង់ទៅ ខ្ញុំចង់រក្សាវាឱ្យនៅដដែល ពីព្រោះអ្នកណាដែលឈ្នះលើវិស័យ AI គឺនឹងឈ្នះលើអ្វីៗទាំងអស់... យើងអាចដាក់ចេញនូវរបាំងការពារ យើងអាចធ្វើនេះធ្វើនោះបាន ប៉ុន្តែខ្ញុំយល់ថា មានកម្លាំងអវិជ្ជមានជាច្រើនដែលកំពុងលើកឡើងពីរឿងទាំងនេះ ទាំងដែលមិនគួរលើកឡើង ហើយពួកគេកំពុងលើកឡើងពីរឿងរ៉ាវដែលនឹងមិនកើតឡើងនោះឡើយ»។

ការលើកឡើងរបស់លោក ត្រាំ ធ្វើឡើងបន្ទាប់ពីអ្នកស្រាវជ្រាវពីររូបនៃក្រុមហ៊ុន Anthropic បានចេញការព្រមានថាកំណើនយ៉ាងលឿននៃ AI អាចនាំឱ្យមានការផុតពូជនៃមនុស្សជាតិក្នុងពេលខាងមុខ។ ទោះជាយ៉ាងណា នាយកប្រតិបត្តិក្រុមហ៊ុន Anthropic លោក Dario Amodei បានស្នើឡើងនូវក្របខណ្ឌ ៣ដំណាក់កាល ដើម្បីគ្រប់គ្រងល្បឿននៃការអភិវឌ្ឍ និងគ្រប់គ្រងហានិភ័យ ខណៈអតីតអ្នកស្រាវជ្រាវរបស់ក្រុមហ៊ុននេះ លោក Jacob Coxon បានលើកឡើងក្នុងកម្មវិធី Meet the Press របស់ទូរទស្សន៍ NBC ថាសហរដ្ឋអាមេរិកចាំបាច់ត្រូវសហការជាមួយបណ្តាប្រទេសដទៃ ដើម្បីចៀសវាងការប្រណាំងប្រជែងដ៏គ្រោះថ្នាក់ជាមួយចិន។

គួរបញ្ជាក់ថា នៅក្នុងអាណត្តិទីពីររបស់លោក រដ្ឋបាលលោក ត្រាំ បានបង្ហាញការគាំទ្រយ៉ាងពេញទំហឹងចំពោះបណ្តាក្រុមហ៊ុនបច្ចេកវិទ្យា AI ធំៗ និងបានប្រឆាំងនឹងការរឹតបន្តឹងច្បាប់តឹងរ៉ឹងលើវិស័យនេះ ដោយចាត់ទុកថាឧត្តមភាពបច្ចេកវិទ្យា AI គឺជាគន្លឹះយុទ្ធសាស្ត្រមិនអាចខ្វះបានក្នុងការប្រកួតប្រជែងសេដ្ឋកិច្ច និងភូមិសាស្ត្រនយោបាយសកលលោកជាមួយទីក្រុងប៉េកាំង៕