(សេអ៊ូល)៖ រដ្ឋាភិបាលទីក្រុងសេអ៊ូល បានឱ្យដឹងថា ប្រទេសកូរ៉េខាងត្បូង និងកាហ្សាក់ស្ថាន បានចុះហត្ថលេខាលើអនុស្សរណៈនៃការយោគយល់គ្នា (MoU) ស្តីពីកិច្ចសហប្រតិបត្តិការលើការប្រើប្រាស់ថាមពលនុយក្លេអ៊ែរដោយសន្តិវិធី នៅថ្ងៃអង្គារនេះ ខណៈដែលថ្នាក់ដឹកនាំនៃប្រទេសទាំងពីរបានប្តេជ្ញាធ្វើការរួមគ្នាលើវិស័យពាណិជ្ជកម្ម ថាមពល រ៉ែសំខាន់ៗ និងបញ្ញាសិប្បនិម្មិត (AI)។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

វិមានប្រធានាធិបតីកូរ៉េខាងត្បូង បានបញ្ជាក់ថា នៅក្នុងជំនួបកំពូលទ្វេភាគី ប្រធានាធិបតីកូរ៉េខាងត្បូង លោក លី ជែមយ៉ុង (Lee Jae Myung) និងប្រធានាធិបតីកាហ្សាក់ស្ថាន លោក Kassym-Jomart Tokayev បានពិភាក្សាអំពីសក្តានុពលក្នុងការពង្រឹងកិច្ចសហប្រតិបត្តិការបន្ថែមទៀត ចំពេលដែលពិភពលោកកំពុងជួបប្រទះភាពមិនប្រាកដប្រជានៃសេដ្ឋកិច្ច។ លោក លី បានថ្លែងទៅកាន់លោក Tokayev ថា «កាហ្សាក់ស្ថានមានសក្តានុពលដ៏ធំធេងនៅក្នុងឧស្សាហកម្មបច្ចេកវិទ្យាខ្ពស់នាពេលអនាគត និងជាដៃគូដ៏សំខាន់សម្រាប់កូរ៉េខាងត្បូង»។ អនុស្សរណៈស្តីពីថាមពលបរមាណូ គឺជាផ្នែកមួយនៃឯកសារកិច្ចព្រមព្រៀងចំនួន ១៣ ដែលត្រូវបានចុះហត្ថលេខា ដែលរួមមានកិច្ចសហការលើវិស័យប្រេងឆៅ វិទ្យាសាស្ត្រ និងបច្ចេកវិទ្យាផងដែរ។

ទន្ទឹមនឹងនេះ នាយករដ្ឋមន្ត្រីកូរ៉េខាងត្បូង លោកស្រី Han Seong-sook បានលើកឡើងនៅក្នុងវេទិកាធុរកិច្ចថា វាជាពេលវេលាដ៏សមស្របដែលប្រទេសទាំងពីរត្រូវពង្រីកកិច្ចសហប្រតិបត្តិការឱ្យលើសពីការធ្វើពាណិជ្ជកម្មប្រេងឆៅ និងសារធាតុអ៊ុយរ៉ាញ៉ូម ដោយត្រូវបញ្ចូលនូវសារធាតុលីចូម (Lithium) និងរ៉ែយុទ្ធសាស្ត្រសំខាន់ៗដទៃទៀត ដោយលោកស្រីបានអញ្ជើញធុរជនឱ្យប្រើប្រាស់បច្ចេកវិទ្យាជឿនលឿនរបស់កូរ៉េខាងត្បូង ក្នុងការរុករក និងទាញយកធនធានរ៉ែដ៏សម្បូរបែបរបស់កាហ្សាក់ស្ថាន ដើម្បីដោះស្រាយបញ្ហាប្រឈមក្នុងខ្សែច្រវាក់ផ្គត់ផ្គង់សកល។

គួរបញ្ជាក់ថា ប្រធានាធិបតីកូរ៉េខាងត្បូង នឹងធ្វើជាម្ចាស់ផ្ទះទទួលស្វាគមន៍លោក Tokayev និងមេដឹកនាំនៃប្រទេសចំនួន ៤ ផ្សេងទៀតនៅតំបន់អាស៉ីកណ្តាល នៅថ្ងៃពុធស្អែកនេះ នៅក្នុងកិច្ចប្រជុំកំពូលពហុភាគី ដើម្បីពិភាក្សាអំពីការពង្រីកកិច្ចសហប្រតិបត្តិការសេដ្ឋកិច្ច ខណៈដែលកូរ៉េខាងត្បូងកំពុងស្វែងរកការធ្វើពិពិធកម្មប្រភពថាមពល និងការផ្គត់ផ្គង់រ៉ែសំខាន់ៗសម្រាប់ឧស្សាហកម្មរបស់ខ្លួន៕