(អូស្លូ)៖ ម្ចាស់រង្វាន់ណូបែលសន្តិភាព លោកស្រី Maria Ressa បានព្រមាននៅថ្ងៃអង្គារនេះថា បច្ចេកវិទ្យាបញ្ញាសិប្បនិម្មិត (AI) ដែលបានឆក់យកការចាប់អារម្មណ៍របស់មនុស្សតាមរយៈបណ្តាញសង្គម និងការកេងចំណេញលើតម្រូវការផ្លូវចិត្ត នឹងដកហូតសិទ្ធិស្វ័យសម្រេចរបស់មនុស្សជាតិ លុះត្រាតែមានការបង្កើតច្បាប់ដើម្បីកម្រិតព្រំដែនបច្ចេកវិទ្យានេះជាបន្ទាន់។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

អ្នកកាសែតសញ្ជាតិហ្វីលីពីន-អាមេរិក ដែលបានឈ្នះរង្វាន់ណូបែលសន្តិភាពឆ្នាំ២០២១ និងបច្ចុប្បន្នជាសហប្រធាននៃក្រុមប្រឹក្សាវិទ្យាសាស្ត្រអន្តរជាតិស្តីពី AI របស់អង្គការសហប្រជាជាតិ បានគូសបញ្ជាក់ថា ប្រជាពលរដ្ឋត្រូវតែរួមគ្នាធ្វើយុទ្ធនាការទាមទារឱ្យមានការបង្កើតច្បាប់ និងបទប្បញ្ញត្តិគ្រប់គ្រងលើ AI ដើម្បីដាក់សម្ពាធលើក្រុមអ្នកនយោបាយ។ ថ្លែងនៅក្នុងបទសម្ភាសន៍អំឡុងទស្សនកិច្ចនៅរដ្ឋធានីអូស្លូ ដើម្បីចូលរួមសន្និសីទស្តីពីការគំរាមកំហែងលើលទ្ធិប្រជាធិបតេយ្យ ស្ថាបនិក និងជានាយកប្រតិបត្តិសារព័ត៌មាន Rappler រូបនេះ បានសង្កត់ធ្ងន់ដូច្នេះថា «ការទាមទារឱ្យមានបទប្បញ្ញត្តិគ្រប់គ្រង មិនមែនជាបញ្ហាសេរីភាពនៃការបញ្ចេញមតិនោះទេ ប៉ុន្តែវាគឺជាបញ្ហាសុវត្ថិភាពសាធារណៈ»។

លោកស្រី Ressa បានព្រមានបន្ថែមថា «ខ្ញុំគិតថាយើងកំពុងស្ថិតក្នុងដំណាក់កាលមួយដែលប្រសិនបើរឿងនេះមិនកើតឡើងទេ យើងនឹងបាត់បង់តុល្យភាព... វានឹងហួសពីការគ្រប់គ្រងរបស់យើង ប្រសិនបើយើងមិនចូលរួមអន្តរាគមន៍នៅពេលនេះទេ»។

គួរបញ្ជាក់ថា ការលើកឡើងរបស់លោកស្រី Ressa កើតមានឡើងចំពេលដែលការព្រួយបារម្ភអំពីគ្រោះថ្នាក់នៃបច្ចេកវិទ្យា AI កម្រិតខ្ពស់កំពុងកើនឡើងជាសកល ខណៈដែលក្រុមអ្នកជំនាញ និងអង្គការសហប្រជាជាតិ កំពុងបន្តអំពាវនាវឱ្យបណ្តារដ្ឋាភិបាលទូទាំងពិភពលោក ពន្លឿនការបង្កើតក្របខណ្ឌគតិយុត្តរួមមួយ ដើម្បីការពារប្រព័ន្ធប្រជាធិបតេយ្យ និងធានាសុវត្ថិភាពដល់មនុស្សជាតិ៕