(យ៉ូហានណេសប៊ឺក)៖ ក្រសួងការបរទេសអាហ្វ្រិកខាងត្បូង បានសម្តែងការព្រួយបារម្ភយ៉ាងខ្លាំងនៅថ្ងៃពុធនេះ ចំពោះចំណាត់ការរឹតបន្តឹងទិដ្ឋាការ (Visa) របស់សហរដ្ឋអាមេរិកលើបុគ្គលមួយចំនួនមកពីអាហ្វ្រិកខាងត្បូង ដោយចោទប្រកាន់ថា ទីក្រុងវ៉ាស៊ីនតោនបានយល់ច្រឡំ និងបកស្រាយបំភ្លៃគោលនយោបាយផ្ទៃក្នុងរបស់ខ្លួន ស្របតាមការឃោសនារបស់ក្រុមជ្រុលនិយមមួយចំនួន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ក្រសួងការបរទេសអាហ្វ្រិកខាងត្បូង បានបញ្ជាក់នៅក្នុងសេចក្តីថ្លែងការណ៍មួយថា «យើងប្រកាន់ជំហរថា បញ្ហាប្រឈមនៅក្នុងទំនាក់ទំនងទ្វេភាគីរបស់យើងជាមួយសហរដ្ឋអាមេរិក អាចដោះស្រាយបានតាមរយៈការចូលរួមប្រកបដោយភាពស្ថាបនាតាមច្រកការទូតរវាងរដ្ឋាភិបាលនៃប្រទេសទាំងពីរប៉ុណ្ណោះ មិនមែនតាមរយៈទង្វើឯកតោភាគីបែបនេះឡើយ»។ ការរឹតបន្តឹងទិដ្ឋាការនេះ ត្រូវបានប្រកាសឡើងដោយរដ្ឋមន្ត្រីការបរទេសអាមេរិក លោក Marco Rubio កាលពីថ្ងៃអង្គារ បើទោះបីជាមិនទាន់មានភាពច្បាស់លាស់ថាតើបុគ្គលណាខ្លះដែលរងផលប៉ះពាល់ជាក់លាក់ក៏ដោយ ខណៈឯកអគ្គរដ្ឋទូតអាមេរិកប្រចាំនៅអាហ្វ្រិកខាងត្បូង បានសរសេរនៅលើបណ្តាញសង្គម X ថា ចំណាត់ការនេះ «គ្រាន់តែជាជំហានដំបូងនៃវិធានការបង្កើនសម្ពាធជាបន្តបន្ទាប់ប៉ុណ្ណោះ»។

គួរបញ្ជាក់ថា ចាប់តាំងពីចាប់ផ្តើមអាណត្តិទីពីរមក ប្រធានាធិបតីអាមេរិក លោក ដូណាល់ ត្រាំ តែងតែបានរិះគន់រដ្ឋាភិបាលអាហ្វ្រិកខាងត្បូងម្តងហើយម្តងទៀត ជុំវិញច្បាប់កែទម្រង់សង្គម និងសេដ្ឋកិច្ច ដែលមានគោលបំណងដោះស្រាយវិសមភាពដែលបន្សល់ទុកតាំងពីសម័យរបបប្រកាន់ពូជសាសន៍អាប៉ាថេត (Apartheid) ដោយលោកបានចោទប្រកាន់ថានេះជាការធ្វើទុក្ខបុកម្នេញលើជនជាតិស្បែកសភាគតិចនៅក្នុងប្រទេសនេះ៕