(ដាកា)៖ វិបត្តិថាមពលដែលបង្កឡើងដោយជម្លោះកាន់តែអាក្រក់នៅតំបន់ឈូងសមុទ្រ និងមជ្ឈិមបូព៌ា បាននិងកំពុងជះផលប៉ះពាល់យ៉ាងធ្ងន់ធ្ងរដល់បណ្តាប្រទេសនៅអាស៉ីខាងត្បូង ជាពិសេសប្រទេសបង់ក្លាដែស និងប៉ាគីស្ថាន ដែលកំពុងប្រឈមនឹងការដាច់ចរន្តអគ្គិសនីញឹកញាប់ ការបិទទ្វាររោងចក្រ និងការឡើងថ្លៃប្រេងឥន្ធនៈយ៉ាងគំហុក។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

នៅក្នុងរដ្ឋធានីដាកា (Dhaka) នៃប្រទេសបង់ក្លាដែស កង្វះខាតការផ្គត់ផ្គង់ឧស្ម័នតាមបំពង់បានបង្ខំឱ្យប្រជាពលរដ្ឋត្រូវរង់ចាំរហូតដល់កណ្តាលអធ្រាត្រដើម្បីចម្អិនអាហារ ខណៈដែលការដាច់ចរន្តអគ្គិសនីជាប្រចាំបានរំខានដល់ជីវភាពរស់នៅ និងបង្ខំឱ្យរោងចក្រជាច្រើនត្រូវផ្អាកដំណើរការ។ ចំណែកឯនៅប្រទេសប៉ាគីស្ថាន ដែលស្ថិតនៅចម្ងាយជាង ២,០០០គីឡូម៉ែត្រពីរដ្ឋធានីដាកា រដ្ឋាភិបាលបានចាប់ផ្តើមដាក់ចេញនូវកម្មវិធីឧបត្ថម្ភធនលើប្រេងឥន្ធនៈកាលពីថ្ងៃពុធ ដើម្បីទប់ទល់នឹងការកើនឡើងថ្លៃប្រេង ប៉ុន្តែកម្មវិធីនេះកំពុងជួបប្រទះបញ្ហារអាក់រអួលក្នុងការចុះឈ្មោះ ដែលបង្កជាការត្អូញត្អែរយ៉ាងខ្លាំងពីសំណាក់ប្រជាពលរដ្ឋ។

វិបត្តិខ្វះខាតថាមពលនេះ បានកើតឡើងបន្ទាប់ពីការវាយប្រហាររបស់សហរដ្ឋអាមេរិក និងអ៉ីស្រាអែលលើប្រទេសអ៉ីរ៉ង់កាលពីជាង ៦ខែមុន បានរំខានដល់ការនាំចេញប្រេង និងឧស្ម័នតាមច្រកសមុទ្រ Hormuz ខណៈដែលការប្រយុទ្ធគ្នារវាងអារ៉ាប៊ីសាអូឌីត និងក្រុមឧទ្ទាមហ៊ូទី ក៏កំពុងគំរាមកំហែងដល់ពាណិជ្ជកម្មតាមសមុទ្រក្រហមផងដែរ។ បញ្ហានៅតាមច្រកផ្លូវទឹកយុទ្ធសាស្ត្រទាំងពីរនេះ បានរុញច្រានតម្លៃឧស្ម័នធម្មជាតិរាវ (LNG) នៅទ្វីបអាស៉ី ឱ្យហក់ឡើងដល់ជិត ៣០ដុល្លារ ក្នុងមួយលាន BTU (British thermal units) នៅសប្តាហ៍នេះ ពោលគឺកើនឡើងបីដងធៀបនឹងតម្លៃមុនសង្គ្រាមដែលមានត្រឹមតែប្រមាណ ១០ដុល្លារប៉ុណ្ណោះ។

គួរបញ្ជាក់ថា ក្រុមហ៊ុនថាមពលយក្ស Shell បានប៉ាន់ប្រមាណថា ពិភពលោកបានបាត់បង់ឧស្ម័ន LNG ប្រមាណ ៣៦លានតោនពីតំបន់មជ្ឈិមបូព៌ានៅក្នុងឆ្នាំនេះ ដោយវិបត្តិខ្វះខាតនេះបានវាយប្រហារខ្លាំងបំផុតទៅលើបណ្តាប្រទេសកំពុងអភិវឌ្ឍន៍ ដែលរដ្ឋាភិបាលមានសមត្ថភាពហិរញ្ញវត្ថុមានកម្រិតក្នុងការធ្វើអន្តរាគមន៍ ដើម្បីទប់ទល់នឹងរលកកំហឹងរបស់សាធារណជនជុំវិញការឡើងថ្លៃទំនិញ និងថាមពល៕