(មូស្គូ)៖ ក្រសួងការពារជាតិរុស្ស៉ី បានប្រកាសនៅថ្ងៃសុក្រនេះថា កងទ័ពរបស់ខ្លួនបានបើកការវាយប្រហារដោយយន្តហោះដ្រូនពេញមួយយប់ លើរោងចក្រឧស្សាហកម្មការពារជាតិ មជ្ឈមណ្ឌលភស្តុភារកម្ម និងកប៉ាល់នានាដែលប្រើប្រាស់ដោយកងទ័ពអ៊ុយក្រែន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ក្រសួងការពារជាតិរុស្ស៉ី បានបញ្ជាក់ថាក្នុងចំណោមគោលដៅដែលត្រូវវាយប្រហារ រួមមានទីតាំងដំឡើង និងស្តុកទុកដ្រូនក្នុងតំបន់កៀវ មជ្ឈមណ្ឌលភស្តុភារកម្មក្នុងតំបន់ Odesa និងហេដ្ឋារចនាសម្ព័ន្ធកំពង់ផែ Reni នៅតាមដងទន្លេ Danube។ ក្រៅពីនេះ កងទ័ពរុស្ស៉ីក៏បានវាយប្រហារលើកប៉ាល់ដឹកទំនិញមួយគ្រឿង ដែលដឹកជញ្ជូនសម្ភារៈយោធា និងទំនិញប្រើប្រាស់ពីរមុខ (Dual-use) ឆ្ពោះទៅកាន់កំពង់ផែ Odesa ផងដែរ។

លើសពីនេះ ក្រសួងការពារជាតិរុស្ស៉ីបានបន្ថែមថា ខ្លួនបានវាយប្រហារលើកប៉ាល់ដឹកទំនិញមួយគ្រឿងទៀតក្នុងតំបន់ Odesa ដែលបានដឹកជញ្ជូនសម្ភារៈយោធាទៅកាន់កំពង់ផែ Chornomorsk ព្រមទាំងបានវាយប្រហារលើមជ្ឈមណ្ឌលភស្តុភារកម្មដែលប្រើប្រាស់ដោយកងទ័ព និងកម្លាំងសន្តិសុខអ៊ុយក្រែន និងមជ្ឈមណ្ឌលទិន្នន័យ (Data Centre) ដែលប្រើប្រាស់សម្រាប់ដំណើរការ និងបញ្ជូនទិន្នន័យចារកម្ម។

គួរបញ្ជាក់ថា ការវាយប្រហារតាមអាកាសរបស់រុស្ស៉ីលើបណ្តាញកំពង់ផែ ផ្លូវទឹក និងហេដ្ឋារចនាសម្ព័ន្ធយោធារបស់អ៊ុយក្រែន បានកើនឡើងកាន់តែខ្លាំងនៅក្នុងរយៈពេលប៉ុន្មានសប្តាហ៍ចុងក្រោយនេះ ក្នុងគោលបំណងកាត់ផ្តាច់ខ្សែច្រវាក់ផ្គត់ផ្គង់សព្វាវុធ និងភស្តុភារកម្មរបស់ទីក្រុងកៀវ៕