(ណៃពិដោ)៖ នៅថ្ងៃចន្ទ ទី២៨ ខែកញ្ញា ឆ្នាំ២០២៦ សមាជិកក្រុមអ្នកជួយសង្គ្រោះនៅមីយ៉ាន់ម៉ា បានឱ្យដឹងថា ទឹកជំនន់ធ្ងន់ធ្ងរ បូករួមជាមួយគ្រោះរអិលបាក់ដី នៅភាគខាងត្បូងប្រទេស បានបណ្តាលឱ្យមនុស្សយ៉ាងហោច ៨នាក់ស្លាប់ ខណៈប្រហែល៣០នាក់ទៀត កំពុងបាត់ខ្លួន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោក Hein Htet មកពីក្រុមភ្នាក់ងារជួយសង្រ្គោះស្ម័គ្រចិត្តក្នុងតំបន់ បានប្រាប់ដូច្នេះថា «យើងបានរកឃើញសាកសពចំនួន៨នាក់ ខណៈមនុស្សចន្លោះពី២០ទៅ៣០នាក់ទៀត កំពុងបាត់ខ្លួន» នៅក្នុងស្រុក Launglon នៃតំបន់ Tanintharyi។ អាជ្ញាធរមីយ៉ាន់ម៉ា មិនទាន់បានចេញផ្សាយតួលេខផ្លូវការ នៃមនុស្សបាត់បង់ជីវិតនៅឡើយទេ ស្របពេលដែលសង្គ្រាមស៊ីវិលអូសបន្លាយ នៅក្នុងប្រទេសនេះ បាននិងកំពុងធ្វើឱ្យកិច្ចខិតខំប្រឹងប្រែងជួយសង្រ្គោះនិងផ្តល់ជំនួយ កាន់តែមានភាពស្មុគស្មាញ។

គួរបញ្ជាក់ថា តំបន់ Tanintharyi ដែលស្ថិតនៅភាគខាងត្បូងបំផុតនៃប្រទេសមីយ៉ាន់ម៉ា បានរងការវាយប្រហារដោយភ្លៀងធ្លាក់ខ្លាំង ចាប់តាំងពីយប់ថ្ងៃទី២៥ ខែកញ្ញា ដែលជាផ្នែកនៃប្រព័ន្ធធាតុអាកាសដ៏តានតឹងមួយ ដែលកំពុងជះឥទ្ធិពលលើប្រទេសថៃនៅក្បែរខាង ផងដែរ និងបានបង្កឱ្យមានទឹកជំនន់ធ្ងន់ធ្ងរនៅទីក្រុងបាងកក។ នៅថ្ងៃចន្ទនេះ រដ្ឋាភិបាលថៃ បានរាយការណ៍ថា មានមនុស្សសរុប៨នាក់បានស្លាប់ ដោយសារគ្រោះទឹកជំនន់ក្នុងប្រទេសទាំងមូល គិតចាប់តាំងពីពាក់កណ្តាលខែកញ្ញា៕