(ប៉េកាំង)៖ នាថ្ងៃទី ២៥ ខែកញ្ញា តាមពេលវេលាក្នុងតំបន់ លោក Han Zheng​ អនុប្រធានរដ្ឋចិន បានអញ្ជើញចូលរួម កិច្ចសន្ទនាជាន់ខ្ពស់ ស្តីពីខួបលើកទី ៥ នៃការលើកឡើងនូវគំនិតផ្តួចផ្តើមអភិវឌ្ឍន៍សកល ដែលរៀងចំឡើងដោយភាគីចិន នៅទីស្នាក់ការកណ្តាលនៃអង្គការ សហប្រជាជាតិនៅក្រុងញូវយ៉ក។ លោកបានអានសារលិខិតអបអរសាទររបស់លោក Xi Jinping​ ប្រធានរដ្ឋចិននិងថ្លែងសុន្ទរកថា។

លោក Han Zheng​ បានលើកឡើងថា កាលពីខែកញ្ញាឆ្នាំ ២០២១ លោក Xi Jinping​ ប្រធានរដ្ឋចិនបានលើកឡើង នូវគំនិតផ្តួចផ្តើមអភិវឌ្ឍន៍សកលនៅក្នុងមហាសន្និបាតអង្គការសហប្រជាជាតិលើកទី ៧៦។ រយៈពេល ៥ ឆ្នាំកន្លងមកនេះ គំនិតផ្តួចផ្តើមអភិវឌ្ឍន៍ សកលបានប្រែក្លាយពីគំនិតផ្តួចផ្តើមរបស់ភាគីចិន ទៅជាសកម្មភាពអន្តរជាតិរួម ក្រោមការជំរុញដោយផ្ទាល់ពីលោក Xi Jinping​ ប្រធានរដ្ឋចិន និងកិច្ចខិតខំប្រឹងប្រែងរួមរបស់គ្រប់ភាគី ដែលបានរួមចំណែកជាផែនការចិន និងកម្លាំងចិនសម្រាប់ការអនុវត្តរបៀបវារៈអង្គការ សហប្រជាជាតិស្តីពីការអភិវឌ្ឍដោយចរីភាពឆ្នាំ ២០៣០។

លោក Han Zheng​ បានសង្កត់ធ្ងន់ថា ប្រទេសចិននឹងបន្តដើរតួនាទីជាប្រទេសធំដែល មានទំនួលខុសត្រូវ ហើយពួតដៃជាមួយបណ្តាប្រទេសនានាធ្វើកិច្ចខិតខំប្រឹងប្រែង ចាត់ទុក ខួបលើកទី ៥ នៃការលើកឡើង នូវគំនិតផ្តួចផ្តើមអភិវឌ្ឍន៍សកលជាទីចាប់ផ្តើមថ្មី បង្កើនកិច្ច សហការក្នុងការអភិវឌ្ឍអន្តរជាតិ និងជំរុញឱ្យពិភពលោកទាំងមូល ឱ្យសម្រេចបាននូវការ អភិវឌ្ឍដែលកាន់តែប្រកបដោយភាពខ្លាំងក្លា​​ ភាពបៃតងនិងភាពរឹងមាំ សំដៅរួមចំណែក កាន់តែច្រើនជួយជំរុញឱ្យកសាងសហគមន៍ជោគវាសនារួមសម្រាប់មនុស្សជាតិ។

គ្រប់ភាគីបានវាយតម្លៃខ្ពស់ចំពោះគំនិតផ្តួចផ្តើមអភិវឌ្ឍន៍សកល ដែលបានដើរតួនាទីយ៉ាងសំខាន់ ក្នុងការរួមចំណែកដល់ការអភិវឌ្ឍ នៃប្រទេសនានា និងជំរុញឱ្យអនុវត្តជាក់ស្តែងនូវរបៀបវារៈស្តីពីការអភិវឌ្ឍដោយចរីភាពឆ្នាំ ២០៣០​ ក្នុងរយៈពេល ៥ ឆ្នាំកន្លងមក​ ហើយមានឆន្ទៈបន្តគាំទ្រគំនិតផ្តួចផ្តើមនេះយ៉ាងមុតមាំ បង្កើនការរួបរួមកិច្ចសម្របសម្រួល និងកិច្ចសហការ ដើម្បីពួតដៃគ្នាបង្កើតអនាគត ដែលកាន់តែប្រកបដោយបរិយាប័ន្ន ចីរភាព និងភាពធន់៕

វិទ្យុមិត្តភាពកម្ពុជាចិន