(ណៃពិដោ)៖ មនុស្សរាប់សិបនាក់បានស្លាប់ ក្នុងការវាយប្រហារតាមផ្លូវអាកាសរបស់យោធាមីយ៉ាន់ម៉ា កាលពីថ្ងៃចន្ទ នៅក្បែរផ្សារមួយកន្លែងក្នុងរដ្ឋរ៉ាឃីន (Rakhine) ជាប់ព្រំដែនបង់ក្លាដែស។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី២៨ ខែកញ្ញា ឆ្នាំ២០២៦ ដោយផ្អែកតាមប្រភពពីក្រុមប្រដាប់អាវុធ និងបុគ្គលិកមនុស្សធម៌ក្នុងមូលដ្ឋាន។

បើតាមក្រុមប្រដាប់អាវុធកងទ័ពអារ៉ាកាន (Arakan Army) ដែលកំពុងប្រយុទ្ធតទល់នឹងយោធាមីយ៉ាន់ម៉ា បានឱ្យដឹងថា មនុស្សយ៉ាងហោច ៣៣ នាក់បានស្លាប់ និង ៣៦ នាក់រងរបួស ក្នុងការទម្លាក់គ្រាប់បែកលើទីប្រជុំជន ខ្យោកតៅ (Kyauktaw)។ លោក វ៉ៃ ហ៊ុនអ៊ុង (Wai Hun Aung) បុគ្គលិកសង្គ្រោះដែលមានក្រុមការងារនៅទីនោះផ្ទាល់ ក៏បានបញ្ជាក់ពីចំនួនអ្នកស្លាប់ និងរងរបួសនេះផងដែរ។

លោក Wai Hun Aung បានបញ្ជាក់ពីទីប្រជុំជន Kyauktaw ថា៖ «ទីតាំងនេះនៅឆ្ងាយពីសមរភូមិប្រយុទ្ធ ហើយគ្មានជាប់ពាក់ព័ន្ធអ្វីជាមួយជម្លោះនោះឡើយ»។

ក្រុម Arakan Army និងលោក Wai Hun Aung បានឱ្យដឹងបន្ថែមថា ការវាយប្រហារនៅទីប្រជុំជន Kyauktaw នេះ ជាហេតុការណ៍ដែលបណ្ដាលឱ្យមនុស្សស្លាប់ច្រើនបំផុតមួយនៅរដ្ឋរ៉ាឃីន បន្ទាប់ពីការវាយប្រហារតាមអាកាសលើមន្ទីរពេទ្យមួយកាលពីខែធ្នូ ឆ្នាំមុន ដែលបានសម្លាប់មនុស្សយ៉ាងហោច ៣០ នាក់។

ទោះជាយ៉ាងណា Reuters មិនទាន់អាចផ្ទៀងផ្ទាត់ព័ត៌មានលម្អិតនេះដោយឯករាជ្យបាននៅឡើយទេ។ ចំណែកអ្នកនាំពាក្យយោធាមីយ៉ាន់ម៉ា ក៏មិនទាន់ឆ្លើយតបនឹងសំណើសុំការបំភ្លឺភ្លាមៗនោះដែរ ខណៈកន្លងមក យោធាតែងតែអះអាងថាកងកម្លាំងរបស់ខ្លួន «បានប្រកាន់ការអត់ធ្មត់ខ្ពស់បំផុត ដើម្បីចៀសវាងការប៉ះពាល់ដល់ជនស៊ីវិល»។

គួរបញ្ជាក់ថា មីយ៉ាន់ម៉ាបានធ្លាក់ក្នុងវិបត្តិវឹកវរចាប់តាំងពីរដ្ឋប្រហារយោធាឆ្នាំ២០២១ ដែលបង្កឱ្យកើតមានសង្គ្រាមស៊ីវិល ហើយក្រុមប្រដាប់អាវុធជាច្រើន រួមទាំងកងទ័ពអារ៉ាកាន (Arakan Army) ផងដែរ កំពុងបន្តប្រយុទ្ធជាមួយកងទ័ពរដ្ឋាភិបាលនៅតាមសមរភូមិជាច្រើន ៕