(កៀវ)៖ អភិបាលតំបន់ Kherson របស់អ៊ុយក្រែន បានឱ្យដឹងថា កងទ័ពអ៊ុយក្រែនបានប្រើប្រាស់យន្តហោះដ្រូន ដើម្បីដឹកជញ្ជូនស្បៀងអាហារ និងថ្នាំពេទ្យទៅកាន់ទីក្រុង Oleshky ដែលកំពុងស្ថិតក្រោមការកាន់កាប់របស់រុស្ស៉ី ខណៈដែលក្រុមមន្ត្រីបានព្រមានអំពីវិបត្តិមនុស្សធម៌កាន់តែអាក្រក់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃអង្គារ ទី២៩​ ខែកញ្ញា ឆ្នាំ២០២៦។

Oleshky ជាទីក្រុងស្ថិតនៅជួរមុខនៃសមរភូមិលើទន្លេ Dnipro ដែលជាខ្សែបន្ទាត់ខណ្ឌចែករវាងកងកម្លាំងរុស្ស៉ី និងអ៊ុយក្រែន ហើយត្រូវបានរុស្ស៉ីកាន់កាប់តាំងពីដើមទីនៃសង្រ្គាមឆ្នាំ២០២២។ អភិបាលតំបន់ Kherson លោក Oleksandr Prokudin បានឱ្យដឹងថា នៅក្នុងប្រតិបត្តិការចុងក្រោយគេ ដ្រូនដែលមានសមត្ថភាពដឹកជញ្ជូនធុនធ្ងន់ បាននាំស្បៀងអាហារ និងសម្ភារវេជ្ជសាស្ត្រប្រមាណ ៤តោន ទៅកាន់ទីតាំងចំនួន ១០០កន្លែងទូទាំងទីក្រុង ក្នុងពេលតែមួយ។

តាមលោក Prokudin មនុស្សជិត ២,០០០នាក់ រួមទាំងកុមារប្រហែល ៥០នាក់ កំពុងត្រូវបានយកធ្វើជាចំណាប់ខ្មាំង ដោយគ្មានអាហារ ថាមពលអគ្គិសនី និងទឹកសម្រាប់ប្រើប្រាស់ ហើយលោកបានចោទប្រកាន់កងកម្លាំងរបស់ទីក្រុងមូស្គូថា បានរារាំងពួកគេមិនឱ្យគេចចេញពីទីក្រុងនោះ។ ក្រុមមន្ត្រីអ៊ុយក្រែនបានព្រមានថា ស្ថានភាពនៅទីក្រុង Oleshky កំពុងតែធ្លាក់ចូលទៅក្នុងសភាពធ្ងន់ធ្ងរ។

ដោយឡែក លោក Dmytro Lubinets ដែលជាមន្ត្រីទទួលបន្ទុកផ្នែកសិទ្ធិមនុស្សរបស់អង្គការសហប្រជាជាតិប្រចាំនៅអ៊ុយក្រែន បានប្រាប់ប្រព័ន្ធផ្សព្វផ្សាយអ៊ុយក្រែនថា រុស្ស៉ីមិនបានយល់ព្រមតាមសំណើរបស់អ៊ុយក្រែន ដែលស្នើឱ្យអនុញ្ញាតឱ្យជនស៉ីវិលជម្លៀសខ្លួនចេញពីទីក្រុង Oleshky ឡើយ។ វិមានក្រឹមឡាំង កាលពីសប្តាហ៍មុនបានទទួលស្គាល់ថា ទីក្រុង Oleshky កំពុងជួបបញ្ហាធ្ងន់ធ្ងរពាក់ព័ន្ធការផ្គត់ផ្គង់ស្បៀងអាហារ និងឱសថ ប៉ុន្តែកងទ័ពរុស្ស៉ីកំពុងខិតខំដោះស្រាយបញ្ហាទាំងនោះហើយ៕