(ប៉េកាំង)៖ មន្ត្រីការទូតកំពូលរបស់ចិន លោក Wang Yi បាននិយាយថា ទំនាក់ទំនងរវាងចិន និងជប៉ុនកំពុងរង់ចាំការធ្វើឱ្យមានប្រក្រតីភាពឡើងវិញ ក្នុងឱកាសរូបលោកបានជួបជាមួយ អតីតរដ្ឋមន្ត្រីការបរទេសជប៉ុន ដែលបានដឹកនាំគណៈប្រតិភូពាណិជ្ជកម្ម មកបំពេញទស្សនកិច្ចនៅទីក្រុងប៉េកាំង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ភាពតានតឹងផ្នែកការទូតរវាងមហាអំណាចសេដ្ឋកិច្ចអាស៊ីទាំងពីរ បានកើនឡើងខ្លាំង ចាប់តាំងពីនាយករដ្ឋមន្ត្រីជប៉ុន លោកស្រី Sanae Takaichi បានលើកឡើង កាលពីខែវិច្ឆិកា ឆ្នាំ២០២៥ ថា ទីក្រុងតូក្យូអាចនឹងធ្វើអន្តរាគមន៍យោធា ប្រសិនបើមានការវាយប្រហារលើកោះតៃវ៉ាន់ ដែលត្រូវទីក្រុងប៉េកាំង អះអាងថាជាផ្នែកមួយនៃទឹកដីរបស់ខ្លួន។ ជាការឆ្លើយតប ចិនបានព្រមានពលរដ្ឋរបស់ខ្លួន កុំឱ្យធ្វើដំណើរទៅជប៉ុន និងបានដាក់វិធានការរឹតត្បិតលើវិស័យពាណិជ្ជកម្ម ដែលតាមសេចក្តីរាយការណ៍ បានជះផលប៉ះពាល់ធ្វើឱ្យការផ្គត់ផ្គង់រ៉ែកម្រសំខាន់ៗទៅកាន់ក្រុមហ៊ុនជប៉ុន ធ្លាក់ចុះយ៉ាងខ្លាំង។

អតីតប្រមុខការទូតជប៉ុន លោក Takeshi Iwaya បានធ្វើដំណើរមកកាន់ប្រទេសចិន ដោយដឹកនាំគណៈប្រតិភូប្រមូលផ្តុំដោយមេដឹកនាំក្រុមហ៊ុន សរុបប្រមាណ៥០នាក់ ដើម្បីជំរុញពាណិជ្ជកម្មទ្វេភាគីឡើងវិញ ក្រោយរងផលប៉ះពាល់ដោយសារការរឹតត្បិត និងការគិតកម្រៃផ្សេងៗ ចាប់តាំងពីខែវិច្ឆិកា ឆ្នាំ២០២៥។ តាមសេចក្តីប្រកាស របស់ក្រសួងការបរទេសចិន លោក Iwaya បានជួបលោក Wang Yi កាលពីថ្ងៃចន្ទសប្តាហ៍នេះ ដែលក្នុងជំនួបនោះ លោករដ្ឋមន្ត្រីការបរទេសចិន បានលើកឡើងថា «ទំនាក់ទំនងចិន-ជប៉ុនបច្ចុប្បន្ន កំពុងប្រឈមនឹងស្ថានការណ៍ធ្ងន់ធ្ងរជាថ្មីម្តងទៀត ហើយកំពុងរង់ចាំការធ្វើឱ្យប្រក្រតីឡើងវិញ»។

គួរបញ្ជាក់ថា ដំណើរទស្សនកិច្ចរបស់លោក Iwaya មកកាន់ទីក្រុងប៉េកាំង កើតឡើងមួយខែបន្ទាប់ពីសមាជិកសភាជប៉ុនមួយក្រុម បានធ្វើទស្សនកិច្ចមករដ្ឋធានីចិន ដើម្បីព្យាយាមស្តារ ទំនាក់ទំនងឡើងវិញ ប៉ុន្តែមិនទទួលបានវឌ្ឍនភាពធំដុំ។ កាលពីខែធ្នូ ឆ្នាំ២០២៤ លោក Iwaya ដែលពេលនោះនៅកាន់តំណែងជារដ្ឋមន្ត្រីការបរទេសជប៉ុន បានធ្វើដំណើរមកជួបលោក Wang នៅទីក្រុងប៉េកាំង ហើយសម្រេចបានការព្រមព្រៀងគ្នាបន្ធូរបន្ថយលក្ខខណ្ឌទិដ្ឋាការសម្រាប់ភ្ញៀវទេសចរចិន បន្ទាប់ពីទីក្រុងប៉េកាំង បានចាត់វិធានការស្រដៀងគ្នា សម្រាប់អ្នកទេសចរជប៉ុន៕