(សិង្ហបុរី)៖ នៅថ្ងៃអង្គារ ទី២៩ ខែកញ្ញា ឆ្នាំ២០២៦ តុលាការក្នុងប្រទេសសិង្ហបុរី បានចោទប្រកាន់បុរសម្នាក់អាយុ ៣០ឆ្នាំ ពាក់ព័ន្ធការបង្កើតរូបភាពដោយប្រើបច្ចេកវិទ្យា AI ថាមានសត្វក្រពើមួយក្បាលនៅក្នុងអាងស្តុកទឹក Pandan ដែលនាំឱ្យអាជ្ញាធរចេញធ្វើប្រតិបត្តិការស្វែងរក និងនាំទៅដល់ការផ្អាកសកម្មភាពកម្សាន្តក្នុងទឹកនៅទីនោះ។ នេះបើយោងតាមការចេញផ្សាយដោយសារព័ត៌មាន CNA។

បុរសរូបនោះមានឈ្មោះ Ye Lin ជាជនជាតិមីយ៉ាន់ម៉ា ត្រូវបានចោទប្រកាន់ចំនួន ២ករណី គឺករណីបញ្ជូនព័ត៌មានមិនពិត និងករណីរារាំងដំណើរការយុត្តិធម៌។ តាមរយៈអ្នកបកប្រែ បុរសរូបនោះបានប្រាប់តុលាការថា គាត់ព្រមទទួលទោសកំហុស ហើយនឹងមិនរកមេធាវីឡើយ។

កាលពីរសៀលថ្ងៃទី២០ ខែសីហា (ម៉ោងក្នុងតំបន់) បុរសឈ្មោះ Ye Lin បានផ្ញើរូបភាពមួយសន្លឹកដែលបង្កើតឡើងដោយ AI បង្ហាញពីរូបសត្វក្រពើមួយក្បាលនៅឯអាងស្តុកទឹក ទៅកាន់បុគ្គលម្នាក់ដែលមានឈ្មោះក្នុងឯកសារតុលាការថា Min Min Oo។ ឯកសារនោះមិនបានបញ្ជាក់ពីទំនាក់ទំនងរបស់ពួកគេទេ ប៉ុន្តែប៉ូលិសបានឱ្យដឹងថា Ye Lin បានផ្ញើរូបភាពនោះទៅឱ្យមិត្តរួមការងាររបស់គាត់។ នៅថ្ងៃបន្ទាប់ Ye Lin បានលុបរូបភាពដែលបង្កើតឡើងដោយ AI និងប្រវត្តិការប្រើប្រាស់តាមកម្មវិធី Gemini AI ចេញពីទូរស័ព្ទដៃ ហើយនេះគឺជាមូលដ្ឋាននៃការចោទប្រកាន់ពីបទរារាំងដល់ដំណើរការយុត្តិធម៌។

ទីភ្នាក់ងារផ្គត់ផ្គង់ទឹក PUB របស់សិង្ហបុរី ទទួលបានព័ត៌មាននៅថ្ងៃទី២០ ខែសីហា ថាមានគេប្រទះឃើញក្រពើមួយក្បាលនៅអាងស្តុកទឹក Pandan ហើយបានជូនដំណឹងទៅកាន់គណៈកម្មការឧទ្យានជាតិ។ ស្ថាប័នទាំងពីរបានធ្វើប្រតិបត្តិការស្វែងរក និងចាប់យកសត្វក្រពើ នៅក្នុងតំបន់នោះ។ ទន្ទឹមនោះ សមាគមអុំទូក និងសហព័ន្ធកីឡាអុំទូកកានូសិង្ហបុរី ក៏ត្រូវបានណែនាំឱ្យផ្អាកសកម្មភាពលើទឹកទាំងអស់ នៅក្នុងទីតាំងនៃអាងស្តុកទឹកនោះផងដែរ។ មកដល់ថ្ងៃទី២១ ខែកញ្ញា ទើប PUB ប្រកាសថារូបភាពនោះគឺរូបបង្កើតឡើងដោយ AI ហើយដាក់ពាក្យបណ្តឹងទៅប៉ូលិស៕