(សេអ៊ូល)៖ ទីភ្នាក់ងារស៊ើបការណ៍សម្ងាត់របស់កូរ៉េខាងត្បូងជឿថាប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ប្រហែលជាបានទម្លាយព័ត៌មានពីការផ្ទេរទាហានកូរ៉េខាងជើងជាឈ្លើយសឹក២នាក់ ក្នុងគោលបំណងជំរុញការគាំទ្រពីសាធារណជនក្នុងប្រទេសកូរ៉េខាងត្បូង ដើម្បីទីក្រុងសេអ៊ូលផ្គត់ផ្គង់អាវុធទៅឱ្យអ៊ុយក្រែន។ នេះបើតាមអ្នកតំណាងរាស្ត្រកូរ៉េខាងត្បូងម្នាក់ ដកស្រង់ចេញផ្សាយដោយទីភ្នាក់ងារសារព័ត៌មាន AFP។

អ្នកតំណាងរាស្ត្រកូរ៉េខាងត្បូង លោក Yoo Yeong-ha ដោយផ្អែកលើការវាយតម្លៃរបស់ទីភ្នាក់ងារស៊ើបការណ៍សម្ងាត់កូរ៉េខាងត្បូង នៅថ្ងៃពុធ ទី៣០ ខែកញ្ញា ឆ្នាំ២០២៦ បានឱ្យដឹងដូច្នេះថា លោក ហ្សេលេនស្គីប្រហែលជាសម្រេចចិត្តទម្លាយព័ត៌មានពីការផ្ទេរទាហានកូរ៉េខាងជើងជាឈ្លើយសឹកទាំង២នាក់ ដោយសង្ឃឹមថាការផ្ទេរពួកគេទៅកាន់កូរ៉េខាងត្បូងនឹងជំរុញឱ្យមានការគាំទ្រពីសាធារណជនក្នុងប្រទេសកូរ៉េខាងត្បូង ដើម្បីឱ្យទីក្រុងសេអ៊ូលផ្គត់ផ្គង់អាវុធ និងជំនួយនៅក្រោមទម្រង់ផ្សេងទៀតសម្រាប់អ៊ុយក្រែន។

គួរបញ្ជាក់ថា ទំនាក់ទំនងរវាងកូរ៉េខាងត្បូង និងអ៊ុយក្រែនកំពុងតានតឹង បន្ទាប់ពីប្រធានាធិបតី លោក ហ្សេលេនស្គី បានប្រកាសឱ្យដឹងជាសាធារណៈពីការផ្ទេរទាហានកូរ៉េខាងជើងទាំង២នាក់ ទៅកាន់កូរ៉េខាងត្បូង អំឡុងថ្លែងសុន្ទរកថាទៅកាន់អង្គមហាសន្និបាតអង្គការសហប្រជាជាតិកាលពីសប្ដាហ៍មុន។ កូរ៉េខាងត្បូងបានចោទប្រកាន់ថាការទម្លាយព័ត៌មាននេះជាទង្វើបំពានលើកិច្ចព្រមព្រៀងដែលទីក្រុងសេអ៊ូល និងទីក្រុងកៀវបានឯកភាពគ្នារក្សាទុករឿងនេះជាការណ៍សម្ងាត់។ បើតាមកូរ៉េខាងត្បូង ការរក្សាទុកការផ្ទេរទាហានកូរ៉េខាងជើងជារឿងសម្ងាត់គឺ មានភាពចាំបាច់ដើម្បីការពារទាហានកូរ៉េខាងជើងទាំង២នាក់ និងក្រុមគ្រួសារសាច់ញាតិរបស់ពួកគេនៅកូរ៉េខាងជើង។ ប៉ុន្តែអ៊ុយក្រែនបានអះអាងថាមិនមានកិច្ចព្រមព្រៀងសម្ងាត់ របៀបនេះឡើយ។

កូរ៉េខាងត្បូងដែលជាប្រទេសផលិតអាវុធដ៏ធំមួយ បានប្រឈមមុខនឹងសម្ពាធពីបណ្ដាលោកខាងលិចមួយចំនួន និងទីក្រុងកៀវឱ្យបញ្ជូនអាវុធទៅឱ្យអ៊ុយក្រែន។ ប៉ុន្តែមកទល់ពេលនេះ សេអ៊ូល បានផ្តោតតែទៅលើការផ្ដល់ជំនួយដែលមិនមែនជាអាវុធអាចសម្លាប់ជីវិតមនុស្សទៅឱ្យអ៊ុយក្រែន ក្នុងនោះដូចជាបរិក្ខារដោះគ្រាប់មីន។​ លោកប្រធានាធិបតីកូរ៉េខាងត្បូង Lee Jae Myung បានប្រកាសផ្ដល់ជំនួយ ១០០លានដុល្លារសម្រាប់អ៊ុយក្រែន នៅឯកិច្ចប្រជុំកំពូល NATO កាលពីខែកក្កដាកន្លងទៅ។ តែរដ្ឋាភិបាលរបស់លោកនៅតែអះអាងថាអាវុធអាចសម្លាប់ជីវិតមនុស្ស ត្រូវបានដកចេញពីកញ្ចប់ជំនួយនេះ៕