(គូឡាឡាំពួ)៖ ការិយាល័យអតីតនាយករដ្ឋមន្ត្រីម៉ាឡេស៉ី បានឱ្យដឹងថា លោក Mahathir Mohamad អតីតនាយករដ្ឋមន្រ្តីម៉ាឡេស៉ី ត្រូវបានបញ្ជូនទៅសម្រាកព្យាបាលនៅមន្ទីរពេទ្យ ពីរថ្ងៃបន្ទាប់ពីភរិយារបស់លោក គឺលោកស្រី Siti Hasmah Mohamad Ali ទទួលមរណភាព។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃព្រហស្បតិ៍ ទី៣០ ខែកញ្ញា ឆ្នាំ២០២៦។

លោក Mahathir ដែលមានអាយុ ១០១ឆ្នាំ ត្រូវបញ្ជូនទៅកាន់មន្ទីរពេទ្យជំនាញផ្នែកបេះដូងរបស់រដ្ឋ ដែលស្ថិតនៅក្នុងទីក្រុងគូឡាឡាំពួ កាលពីយប់ថ្ងៃអង្គារ ដើម្បីតាមដានសុខភាព ប៉ុន្តែហេតុផលនៃការចូលសម្រាកព្យាបាលនេះ មិនទាន់ច្បាស់លាស់នៅឡើយទេ ដោយត្រូវរង់ចាំការធ្វើរោគវិនិច្ឆ័យជាផ្លូវការ។ នេះបើតាមការបញ្ជាក់ពីជំនួយការរបស់លោក គឺលោក Sufi Yusoff។

លោក Mahathir ដែលបានដឹកនាំម៉ាឡេស៉ីអស់រយៈពេលជាង ២០ឆ្នាំ ក្នុងអាណត្តិពីរផ្សេងគ្នា ធ្លាប់មានបញ្ហាបេះដូង និងទទួលការវះកាត់តសរសៃឈាម។ លោកត្រូវបានបញ្ជូនទៅសម្រាកព្យាបាលនៅមន្ទីរពេទ្យជាច្រើនលើក ក្នុងរយៈពេលប៉ុន្មានឆ្នាំចុងក្រោយ ដោយចុងក្រោយបង្អស់គឺកាលពីខែមករា ដោយសារតែដួលបាក់ឆ្អឹងត្រគាក។

លោកស្រី Siti Hasmah ដែលជាគ្រូពេទ្យ និងជាអ្នកតស៊ូមតិផ្នែកសុខភាពសាធារណៈ និងបានរៀបអាពាហ៍ពិពាហ៍ជាមួយលោក Mahathir អស់រយៈពេល ៧០ឆ្នាំនោះ បានទទួលមរណភាពកាលពីថ្ងៃចន្ទ ក្នុងអាយុ ១០០ឆ្នាំ។ លោក Mahathir បានបង្ហាញអារម្មណ៍សោកសៅយ៉ាងខ្លាំង ដោយនិយាយរៀបរាប់ទាំងទឹកភ្នែកទៅកាន់អតីតព្រះមហាក្សត្រថា លោកមិននឹកស្មានថា ភរិយារបស់គាត់ស្រាប់តែទទួលមរណភាពបែបនេះឡើយ៕