(សេអ៊ូល)៖ ត្រីឆ្លាម១ក្បាល ដែលជាប់គាំងក្នុងព្រែកជីកនៅកំពង់ផែប៊ូសាន (Busan) ប្រទេសកូរ៉េខាងត្បូង កំពុងទាក់ទាញចំណាប់អារម្មណ៍យ៉ាងខ្លាំង ខណៈមនុស្សប្រមាណ ៦០ ម៉ឺននាក់ បានសម្រុកទៅមើលវាក្នុងរយៈពេល ២ សប្តាហ៍មកនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី៣០ ខែកញ្ញា ឆ្នាំ២០២៦។

គេប្រទះឃើញត្រីឆ្លាមប្រវែង ៣.៥ ម៉ែត្រនេះ ដំបូងក្នុងផ្លូវទឹកតូចចង្អៀតនៃកំពង់ផែខាងជើង (North Port) តាំងពីថ្ងៃទី១៨ ខែកញ្ញា។ ដោយឃើញវាមិនអាចហែលចេញទៅសមុទ្រវិញ អាជ្ញាធរបានព្យាយាមជួយសង្គ្រោះកាលពីថ្ងៃអង្គារ ដោយប្រើទូកបាញ់កម្លាំងទឹកពីក្រោយដើម្បីរុញវាចេញ តែមិនបានសម្រេចឡើយ ព្រោះវាហែលគេចចេញពីចរន្តទឹក។

កាសែត Chosun Daily បានឱ្យដឹងថា អាជ្ញាធរគ្រោងប្រើសំណាញ់ដើម្បីនាំផ្លូវវាចេញពីព្រែកជីកនៅថ្ងៃសុក្រនេះ។ ត្រីឆ្លាមពូជ Bronze Whaler នេះ បានក្លាយជាតារាល្បីនៅកូរ៉េខាងត្បូង ហើយថែមទាំងទទួលបានឈ្មោះហៅក្រៅថា «ប៊ូខាំងហ្គី (Bukangi)» ទៀតផង។

ក្នុងឱកាសឈប់សម្រាកបុណ្យឈូសក (Chuseok) រយៈពេល ៤ ថ្ងៃកាលពីចុងសប្តាហ៍មុន មនុស្សប្រមាណ ៤៨ ម៉ឺននាក់បានសម្រុកទៅលេងសួនកម្សាន្តមាត់ទឹកក្បែរកន្លែងត្រីឆ្លាមជាប់ ខណៈធម្មតាសួននេះមានភ្ញៀវត្រឹម ២,០០០ នាក់ប៉ុណ្ណោះក្នុងមួយថ្ងៃ។ ឃើញបែបនេះ រដ្ឋបាលក្រុងប៊ូសាន ថែមទាំងបានប្រកាសតែងតាំងត្រីឆ្លាម «Bukangi» ជាទូតសុឆន្ទៈកិត្តិយសរបស់ទីក្រុង បន្ទាប់ពីការស្ទង់មតិលើ Instagram ទទួលបានសំឡេងគាំទ្ររហូតដល់ ៩១% ៕