(Reuters)៖ មេដឹកនាំអ៉ីស្រាអែល និងឥណ្ឌាបានកោតសរសើរពីឡុតឥណ្ឌាម្នាក់ លោក Smit Machchhar ជាវីរបុរសសម្រាប់ការជួយសង្រ្គោះជីវិតអ្នកដំណើរ បន្ទាប់ពីរូបលោកត្រូវបានមិត្តរួមការងារចាក់ឱ្យរងរបួស នៅក្នុងអ្វីដែលគេសង្ស័យថាជាការប៉ុនប៉ងធ្វើឱ្យ យន្ដហោះដឹកអ្នកដំណើរមួយគ្រឿងរបស់ក្រុមហ៊ុនអាកាសចរណ៍ flydubai ធ្លាក់កាលពីថ្ងៃពុធសប្ដាហ៍នេះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ក្រុមមន្ត្រីអ៉ីស្រាអែលបាននិយាយថាអ្នកដំណើរនៅលើជើងហោះហើរខាងលើបានធ្វើដំណើរទៅដល់អ៉ីស្រាអែលដោយសុវត្ថិភាព កាលពីថ្ងៃពុធ ទី៣០ ខែកញ្ញា ឆ្នាំ២០២៦ បន្ទាប់ពីអ្នកដំណើរ និងបុគ្គលិកធ្វើការនៅលើយន្ដហោះបានបញ្ឈប់ការប៉ុនប៉ុនរបស់ពីឡុតម្នាក់ទៀតដែលចង់ធ្វើឱ្យ យន្ដហោះនេះធ្លាក់។ ការប្រវាយប្រតប់គ្នាបានកើតឡើងនៅពេលលោក Smit Machchhar ត្រូវបានមិត្តរួមការងារជាសហពីឡុតរបស់លោកចាក់ឱ្យរងរបួស និងព្យាយាមបើកយន្ដហោះធ្លាក់ចុះ នៅត្រឹមរយៈកម្ពស់ ៤,២៦៧ម៉ែត្រ ក្នុងរយៈពេលមិនដល់៣០វិនាទី។

អ្នកនាំពាក្យម្នាក់របស់នាយករដ្ឋមន្ត្រីអ៉ីស្រាអែល លោក Benjamin Netanyahu បានប្រាប់ Reuters ថាលោក Machchhar ដែលប្រឡាក់ដោយឈាមបានព្យាយាមបើកទ្វារកាប៊ីនរបស់ពីឡុតយន្ដហោះដែលនេះបានអនុញ្ញាតឱ្យអ្នកដំណើរ និងបុគ្គលិកអាចបញ្ឈប់សកម្មភាពរបស់ពីឡុតម្នាក់ទៀតនោះ។ ជាសំណាងល្អ មានពីឡុត ២នាក់ទៀតរបស់ក្រុមហ៊ុន flydubai ជិះនៅលើយន្ដហោះនោះដែរ បានបញ្ជាយន្ដហោះឱ្យចុះចតដោយសុវត្ថិភាពនៅអាកាសយានដ្ឋានក្នុងទីក្រុង Tabuk ប្រទេសអារ៉ាប៊ីសាអូឌីត។ «លោក (Machchhar) បានជួយសង្រ្គោះជីវិតមនុស្ស ១៧៤នាក់ ក្នុងនោះរួមមានទាំងពលរដ្ឋអ៉ីស្រាអែល និងជនជាតិដទៃទៀត»។ នេះជាការគូសបញ្ជាក់របស់លោក Netanyahu ក្នុងការបង្ហោះមួយ លើបណ្ដាញទំនាក់ទំនងសង្គម X។

ដោយឡែក ក្នុងការបង្ហោះមួយលើបណ្ដាញទំនាក់ទំនងសង្គម X នៅព្រឹកថ្ងៃព្រហស្បតិ៍ ទី១ ខែតុលា ឆ្នាំ២០២៦ លោកនាយករដ្ឋមន្ត្រី Narendra Modi ​ក៏បានកោតសរសើរ លោក Machchhar ផងដែរដោយចាត់ទុកជាវីរបុរស។

គួរបញ្ជាក់ថា មូលហេតុនៅពីក្រោយហេតុការណ៍ចាក់គ្នារវាងពីឡុតនៅលើយន្ដហោះខាងលើមិនទាន់មានការបញ្ជាកឱ្យច្បាស់ទេ ខណៈក្រុមហ៊ុន Flydubai បានគូសបញ្ជាក់ថាមូលហេតុនៅពីក្រោយហេតុការណ៍នេះមិនទាន់ដឹងច្បាស់ឡើយទេ និងព្រមានប្រឆាំងនឹងការសន្និដ្ឋានលឿនពេក។ Flydubai បានសម្រេចចិត្តផ្អាកជើងហោះហើរទៅនិងមកអ៉ីស្រាអែលជាបណ្ដោះអាសន្ន ខណៈការស៊ើបអង្កេតមួយកំពុងធ្វើឡើង។ ប៉ុន្តែ លោក Netanyahu បាននិយាយថាព្រឹត្តិការណ៍ដែលបានកើតឡើងគឺជាឧបទ្ទហេតុសន្តិសុខធ្ងន់ធ្ងរ ហើយអាជ្ញាធរអារ៉ាប៊ីសាអូឌីតនឹងសួរចម្លើយសហពីឡុតនៃជើងហោះហើរ flydubai FZ1073 ដែលមានគោលដៅហោះហើរពីអេមីរ៉ាតអារ៉ាប់រួមឆ្ពោះទៅកាន់អ៉ីស្រាអែល៕