(តេហេរ៉ង់)៖ កងកម្លាំងឆ្មាំបដិវត្តន៍អ៉ីរ៉ង់ (IRGC) នៅថ្ងៃព្រហស្បតិ៍ ទី១ ខែតុលា ឆ្នាំ២០២៦ បានចេញមុខស្វាគមន៍ ការដកកងទ័ពអាមេរិកចេញពីប្រទេសអ៉ីរ៉ាក់ ដោយហៅវាថា ជាជ័យជម្នះប្រវត្តិសាស្ត្រមួយ និងអំពាវនាវឱ្យកងទ័ពអាមេរិក ចាកចេញពីតំបន់មជ្ឈិមបូព៌ាទាំងមូល។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

IRGC បាននិយាយក្នុងសេចក្តីថ្លែងការណ៍មួយ ដែលប្រព័ន្ធផ្សព្វផ្សាយផ្លូវការរបស់ខ្លួនចេញផ្សាយថា «ឆ្មាំបដិវត្តន៍សូមអបអរសាទរ ដល់ប្រជាជាតិអ៉ីរ៉ាក់ដ៏មានមោទនភាព ក៏ដូចជាដល់រណសិរ្សរួបរួមនៃចលនាតស៊ូអ៉ីស្លាម និងអ្នកប្រយុទ្ធបដិវត្តន៍នៃពិភពអ៉ីស្លាម សម្រាប់ជ័យជម្នះប្រវត្តិសាស្ត្រនេះ»។

កាលពីថ្ងៃពុធសប្តាហ៍នេះ ក្រុមយោធាចម្រុះដឹកនាំដោយសហរដ្ឋអាមេរិក ដែលបានដាក់ពង្រាយកងកម្លាំងទៅកាន់អ៉ីរ៉ាក់និងស៊ីរី កាលពីឆ្នាំ២០១៤ ដើម្បីប្រយុទ្ធប្រឆាំងក្រុមភេរវករ ISIS បានបញ្ចប់បេសកកម្មរបស់ខ្លួនជាផ្លូវការ និងដកកងកម្លាំងចេញទៅវិញ។ ក្រុម ISIS ដែលធ្លាប់កាន់កាប់ទឹកដីមួយភាគធំនៅក្នុងប្រទេសទាំងពីរ និងបានប្រព្រឹត្តសកម្មភាពសម្លាប់រង្គាល និងអំពើឃោរឃៅជាច្រើន ត្រូវបានផ្តួលរំលំនៅអ៉ីរ៉ាក់ កាលពីក្នុងឆ្នាំ២០១៧ និងនៅស៊ីរីក្នុងឆ្នាំ២០១៩។ ប៉ុន្តែកងកម្លាំងរបស់ក្រុមចម្រុះ នៅតែបន្តរក្សាវត្តមាន ដើម្បីប្រយុទ្ធប្រឆាំងនឹង សមាជិករបស់ក្រុម ISIS ដែលនៅសេសសល់។

សេចក្តីថ្លែងការណ៍របស់ឆ្មាំបដិវត្តន៍អ៉ីរ៉ង់ បាននិយាយថា «សហរដ្ឋអាមេរិកត្រូវតែចាកចេញពីតំបន់មជ្ឈិមបូព៌ា ហើយប្រគល់ការគ្រប់គ្រងសន្តិសុខ ឱ្យប្រទេសនានានៅក្នុងតំបន់ផ្ទាល់វិញ»។ សេចក្តីថ្លែងការណ៍បានបន្ថែមថា «រយៈពេលពីរទសវត្សរ៍នៃការត្រួតត្រា បានបង្ហាញឱ្យឃើញថា វត្តមានរបស់សហរដ្ឋអាមេរិក មិនបាននាំមកនូវសន្តិសុខឡើយ ផ្ទុយទៅវិញ វាជាប្រភពនៃអសន្តិសុខ អំពើភេរវកម្ម និងអស្ថិរភាពនៅអាស៊ីខាងលិច (មជ្ឈិមបូព៌ា)»។

ទីក្រុងបាដាដ និងទីក្រុងវ៉ាស៊ីនតោន បានព្រមព្រៀងគ្នាកាលពីឆ្នាំ២០២៤ ដើម្បីបញ្ចប់បេសកកម្មរបស់ក្រុមយោធាចម្រុះ ហើយកងកម្លាំងរបស់ក្រុមយោធានេះ បានចាប់ផ្តើមដកចេញជាបន្តបន្ទាប់ ពីមូលដ្ឋាននានាទូទាំងប្រទេស ដោយកំណត់វត្តមានរបស់ខ្លួន នៅត្រឹមតំបន់ស្វយ័ត Kurdistan នៅភាគខាងជើងប្រទេសអ៉ីរ៉ាក់។

ទន្ទឹមគ្នានេះ រដ្ឋាភិបាលអ៉ីរ៉ាក់ បាននិយាយថា ការដកកងកម្លាំងរបស់ក្រុមយោធាចម្រុះដឹកនាំដោយអាមេរិក នឹងលុបចោលលេស ដែលចលនាប្រដាប់អាវុធដ៏មានឥទ្ធិពលគាំទ្រដោយអ៉ីរ៉ង់ បានប្រើប្រាស់ដើម្បីបន្តរក្សាការកាន់កាប់អាវុធរបស់ពួកគេ។ នៅថ្ងៃព្រហស្បតិ៍នេះ នាយករដ្ឋមន្ត្រីអ៉ីរ៉ាក់ លោក Ali al-Zaidi បានប្រកាសកំណត់យកថ្ងៃទី៣០ ខែមិថុនា ឆ្នាំ២០២៧ ជាកាលបរិច្ឆេទថ្មី សម្រាប់ក្រុមប្រដាប់អាវុធទាំងអស់ ប្រគល់អាវុធរបស់ពួកគេមកឱ្យរដ្ឋ។

គួរបញ្ជាក់ថា កាលពីថ្ងៃពុធ ប្រធានាធិបតីអាមេរិក លោក ដូណាល់ ត្រាំ ក៏បានប្រកាសចាត់ទុកដែរថា ការដកខ្លួនរបស់កងកម្លាំងយោធាចម្រុះ ដឹកនាំដោយអាមេរិក នៅក្នុងប្រទេសអ៉ីរ៉ាក់ គឺជាជ័យជម្នះមួយសម្រាប់ទីក្រុងវ៉ាស៉ីនតោន បើទោះជាមានការព្រួយបារម្ភថា ការដកកងទ័ពអាមេរិកអាចនឹងធ្វើឱ្យ ចលនាប្រដាប់អាវុធគាំទ្រដោយអ៉ីរ៉ង់កាន់តែឡើងចាងក៏ដោយ៕