(វ៉ាស៊ីនតោន)៖ មន្ទីរបញ្ចកោណអាមេរិក កាលពីថ្ងៃព្រហស្បតិ៍ ទី១ ខែតុលា ឆ្នាំ២០២៦ បានប្រកាសផ្តល់កិច្ចសន្យាតម្លៃ ២៤,៤ ពាន់លានដុល្លារ ដល់ក្រុមហ៊ុន Raytheon ដើម្បីពន្លឿនការផលិតមីស៊ីល SM-6 ស្របពេលដែលទីក្រុងវ៉ាស៊ីនតោន កំពុងព្យាយាមបំពេញស្តុកគ្រាប់មីស៊ីល និងគ្រាប់សព្វាវុធដទៃទៀតឡើងវិញ បន្ទាប់ពីពួកវាត្រូវបានប្រើប្រាស់ក្នុងបរិមាណដ៏ច្រើន ក្នុងសង្គ្រាមជាមួយអ៉ីរ៉ង់។ នេះប​ើតាមការចេញផ្សាយដោយ ទីភ្នាក់ងារព័ត៌មាន AFP។

មន្ទីរបញ្ចកោណ បាននិយាយក្នុងសេចក្តីថ្លែងការណ៍ថា មីស៊ីលទាំងនេះគឺជា «គ្រាប់អាវុធដ៏សំខាន់សម្រាប់សង្គ្រាមប្រឆាំងគោលដៅ នៅលើអាកាស និងលើផ្ទៃសមុទ្រ»។ មន្ទីរបញ្ចកោណបានបន្ថែមថា កិច្ចព្រមព្រៀងរយៈពេល៥ឆ្នាំនេះ ដែលមានជម្រើសបន្ថែមរយៈពេល ២ឆ្នាំទៀត នឹងជំរុញការផលិតឱ្យកាន់តែឆាប់រហ័សជាងមុន។ សេចក្តីថ្លែងការណ៍បានបញ្ជាក់ថា កិច្ចព្រមព្រៀងនេះ «ផ្តល់ឱ្យឧស្សាហកម្មការពារជាតិ នូវភាពច្បាស់លាស់ក្នុងរយៈពេលវែងដែលចាំបាច់ ដើម្បីពង្រីកសមត្ថភាពកម្លាំងពលកម្ម និងធានាខ្សែច្រវាក់ផ្គត់ផ្គង់សំខាន់ៗ»។

រហូតមកទល់ពេលនេះ ប្រធានាធិបតី ដូណាល់ ត្រាំ ហាក់ដូចជាមិនខ្វាយខ្វល់ឡើយ អំពីសំណួរជុំវិញផលប៉ះពាល់ធ្ងន់ធ្ងរ ដែលសង្គ្រាមជាមួយអ៉ីរ៉ង់ បានបង្កឡើងចំពោះស្តុកគ្រាប់សព្វាវុធរបស់យោធាអាមេរិក។ សហរដ្ឋអាមេរិកនិងអ៉ីស្រាអែល បានរួមគ្នាបំផ្ទុះសង្គ្រាមប្រឆាំងប្រទេសអ៉ីរ៉ង់ កាលពីថ្ងៃទី២៨ ខែកុម្ភៈ។

យ៉ាងណាមិញ អគ្គាធិការនៃក្រសួងការពារជាតិអាមេរិក បាននិយាយកាលពីខែកញ្ញាថា ការប្រើប្រាស់គ្រាប់សព្វាវុធក្នុងប្រតិបត្តិការ Epic Fury ដែលសំដៅលើសង្រ្គាមនៅអ៉ីរ៉ង់ បានបង្កជាបញ្ហាខ្វះខាតស្តុកគ្រាប់ជាយុទ្ធសាស្រ្ត និងបង្ហាញឱ្យឃើញពីចំណុចរាំងស្ទះ នៅក្នុងមូលដ្ឋានឧស្សាហកម្ម សម្រាប់ការផ្គត់ផ្គង់គ្រាប់អាវុធឡើងវិញ។ រីឯរបាយការណ៍មួយ របស់ការិយាល័យ Congressional Budget Office ចេញផ្សាយកាលពីថ្ងៃទី១៥ ខែកញ្ញា ក៏បានលើកឡើងពីផលប៉ះពាល់លើស្តុកគ្រាប់ប្រព័ន្ធការពារមីស៊ីល ដែលនឹងធ្វើឱ្យអាមេរិក មានស្តុកមីស៊ីលបាញ់ស្ទាក់ ស្ថិតក្រោមបរិមាណថយចុះ សម្រាប់រយៈពេលជាច្រើនឆ្នាំខាងមុខផងដែរ។

គួរបញ្ជាក់ថា រយៈពេលជាង៧ខែ បន្ទាប់ពីការវាយប្រហារដំបូងរបស់អាមេរិកនិងអ៉ីស្រាអែល លើប្រទេសអ៉ីរ៉ង់ ទីក្រុងតេហេរ៉ង់ នាពេលនេះនៅតែបន្តគ្រប់គ្រងច្រកសមុទ្រ Hormuz ដ៏សំខាន់ ខណៈទីក្រុងវ៉ាស៊ីនតោនកំពុងបន្តបិទខ្ទប់កំពង់ផែរបស់អ៉ីរ៉ង់។ កាសែត Wall Street Journal នាពេលថ្មីៗនេះបានរាយការណ៍ថា លោក ត្រាំ បានប្រាប់ក្រុមមន្រ្តីជំនិតរបស់លោកថា លោករំពឹងនឹងចាប់ផ្តើមការទម្លាក់គ្រាប់បែកលើអ៉ីរ៉ង់ឡើងវិញ នៅចុងខែវិច្ឆិកា ដែលអាចនឹងនាំឱ្យមានការវាយប្រហារបន្ថែមពីអ៉ីរ៉ង់ ក៏ដូចជាការប្រើប្រាស់គ្រាប់សព្វាវុធរបស់អាមេរិក កាន់តែច្រើនថែមទៀត៕