(សេអ៊ូល)៖ ប្រធានាធិបតីកូរ៉េខាងត្បូង លោក Lee Jae Myung បាននិយាយនៅថ្ងៃសុក្រ ទី២ ខែតុលា ឆ្នាំ២០២៦ ថា ទីក្រុងសេអ៊ូលនឹងចាត់វិធានការបន្ថែម ប្រសិនបើអ៊ុយក្រែន បន្តបដិសេធសុំទោសជាសាធារណៈ ជុំវិញអ្វីដែលលោកហៅថា ការទម្លាយព័ត៌មានដោយឯកតោភាគី អំពីការបញ្ជូនអ្នកទោសសង្គ្រាមកូរ៉េខាងជើង មកកាន់កូរ៉េខាងត្បូង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានបង្ហើបឱ្យដឹងកាលពីសប្តាហ៍មុនថា ប្រទេសរបស់លោក បានបញ្ជូនទាហានកូរ៉េខាងជើងពីរនាក់មកកាន់កូរ៉េខាងត្បូង ដោយលោកបាននិយាយថា ពួកគេ «មិនងាយស្រួលចាប់បានទាំងរស់នោះទេ»។

ប៉ុន្មានម៉ោងបន្ទាប់ពីសុន្ទរកថារបស់លោក ហ្សេលេនស្គី នៅអង្គការសហប្រជាជាតិ លោក Lee បានបង្ហាញការខកចិត្តជាខ្លាំង ខណៈទីក្រុងសេអ៊ូលបានអះអាងថា ការរក្សាការសម្ងាត់អំពីរឿងនេះ គឺមានសារៈសំខាន់ណាស់ ដើម្បីការពារគ្រួសារសាច់ញាតិ របស់អ្នកទោសសង្គ្រាម ពីផលវិបាកណាមួយនៅក្នុងប្រទេសកូរ៉េខាងជើង។ ក្រោយមក ទីក្រុងសេអ៊ូលបានទាមទារឱ្យអ៊ុយក្រែន សុំទោសជាផ្លូវការ។

លោកប្រធានាធិបតីកូរ៉េខាងត្បូង បាននិយាយនៅថ្ងៃសុក្រនេះថា «ប្រសិនបើអ៊ុយក្រែននៅតែបន្តបដិសេធទទួលស្គាល់ការពិត និងមិនព្រមសុំទោសជាសាធារណៈ យើងនឹងចាត់វិធានការបន្ថែម»។ លោកបានចោទប្រកាន់ទីក្រុងកៀវថា បានធ្វើឱ្យលោកមើលទៅ ដូចជា «មនុស្សកុហក»។ លោក Lee បានបង្ហោះលើបណ្តាញសង្គម X យ៉ាងដូច្នេះថា «នេះជាបញ្ហាពាក់ព័ន្ធនឹងសេចក្តីថ្លៃថ្នូរ របស់សាធារណរដ្ឋកូរ៉េ និងប្រជាជនកូរ៉េខាងត្បូង ហើយមិនអាចមើលរំលងបានដាច់ខាត»។

គួរបញ្ជាក់ថា លោក Lee បានសំដៅទៅលើបទសម្ភាសមួយរបស់រដ្ឋមន្ត្រីការបរទេសអ៊ុយក្រែន លោក Andrii Sybiha ដែលត្រូវបានចេញផ្សាយដោយសារព័ត៌មាន RBC-Ukraine និងប្រព័ន្ធផ្សព្វផ្សាយអ៊ុយក្រែនផ្សេងទៀត កាលពីថ្ងៃព្រហស្បតិ៍។ លោក Sybiha បាននិយាយថា លោកមិនចង់ហៅរឿងនេះថាជាឧប្បត្តិហេតុទេ ហើយបានពិពណ៌នាវាជំនួសវិញថា ជាការយល់ច្រឡំផ្នែកការទូត។ លោកបានលើកឡើងដូច្នេះថា «កូរ៉េខាងត្បូងគឺជាប្រទេសសំខាន់មួយសម្រាប់យើង។ ហើយខ្ញុំពិតជាសង្ឃឹមថា នឹងមានវឌ្ឍនភាពទៅមុខ ការបន្តកិច្ចសហប្រតិបត្តិការ ព្រមទាំងលទ្ធផលជាក់ស្តែង សម្រាប់អ្វីដែលយើងពិតជាកំពុងព្យាយាមសម្រេចឱ្យបានជាមួយពួកគេ»៕