(តៃប៉ិ)៖ អតីតមេដឹកនាំតៃវ៉ាន់ លោកស្រី Tsai Ing-wen បាននិយាយនៅថ្ងៃសុក្រ ទី២ ខែតុលា ឆ្នាំ២០២៦ថា លោកស្រី នឹងទៅបំពេញទស្សនកិច្ចនៅសហរដ្ឋអាមេរិក នាសប្តាហ៍ក្រោយ ដើម្បីថ្លែងសុន្ទរកថាក្នុងសន្និសីទសន្តិសុខមួយរបស់សាកលវិទ្យាល័យ Stanford។ វាជាលើកដំបូងបំផុត ដែលលោកស្រីធ្វើដំណើរទៅកាន់អាមេរិក ចាប់តាំងពីលោកស្រីចាកចេញពីតំណែងក្នុងឆ្នាំ២០២៤។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោកស្រី Tsai បានសរសេរនៅលើ Facebook ថា លោកស្រីនឹងចូលរួមសន្និសីទ Stanford DEFCON 2026 Technology & National Security Conference និងថ្លែងសុន្ទរកថាបើកកម្មវិធី។ ទោះមានការគ្រប់គ្រងដឹកនាំតាមបែបប្រជាធិបតេយ្យក៏ដោយ តៃវ៉ាន់ត្រូវបានរដ្ឋាភិបាលទីក្រុងប៉េកាំង ចាត់ទុកជាផ្នែកមួយនៃទឹកដីរបស់របស់ប្រទេសចិន ហើយចិនតែងតែប្រឆាំងជំទាស់ដាច់អហង្ការ ចំពោះការធ្វើដំណើរទៅក្រៅប្រទេសរបស់មន្ត្រីជាន់ខ្ពស់តៃវ៉ាន់ រួមទាំងអតីតមេដឹកនាំ។ចាប់តាំងពីចាកចេញពីតំណែងមក លោកស្រី Tsai ធ្លាប់បានធ្វើដំណើរទៅកាន់ប្រទេសមួយចំនួនរួចហើយ រួមមានព្រីតថេន (ចក្រភពអង់គ្លេស) បារាំង និងកាណាដា ជាដើម។

ចិនបានបដិសេធបើកកិច្ចសន្ទនាជាមួយលោកស្រី Tsai បន្ទាប់ពីលោកស្រី​ ជាប់ឆ្នោតជាមេដឹកនាំតៃវ៉ាន់ដំបូង កាលពីក្នុងឆ្នាំ២០១៦ ហើយជាប់ឆ្នោតសាជាថ្មី ក្នុងឆ្នាំ២០២០ ដោយទីក្រុងប៉េកាំងចាត់ទុកលោកស្រី និងគណបក្ស Democratic Progressive Partyរបស់លោកស្រីថាជា «ក្រុមផ្តាច់ខ្លួន»។ ទីក្រុងប៉េកាំង ក៏បានបន្តបដិសេធមិននិយាយជាមួយអ្នកបន្តតំណែងរបស់លោកស្រីផងដែរ គឺមេដឹកនាំបច្ចុប្បន្ន លោក Lai Ching-te។

គួរបញ្ជាក់ថា លោក Lai មិនទាន់បានធ្វើដំណើរទៅកាន់សហរដ្ឋអាមេរិកនៅឡើយទេ ក្រោមរដ្ឋបាលអាណត្តិទី២ របស់ប្រធានាធិបតី លោក ដូណាល់ ត្រាំ។ អាមេរិកមិនមានទំនាក់ទំនងការទូតផ្លូវការជាមួយតៃវ៉ាន់ក៏ពិតមែន ប៉ុន្តែជាខ្នងបង្អែកអន្តរជាតិធំបំផុតរបស់តៃវ៉ាន់ និងជាអ្នកផ្គត់ផ្គង់អាវុធដ៏សំខាន់។ រដ្ឋាភិបាលទីក្រុងតៃប៉ិ និយាយថា ខ្លួនមានសិទ្ធិធ្វើទំនាក់ទំនងជាមួយពិភពលោកខាងក្រៅ ហើយបដិសេធការអះអាងអធិបតេយ្យរបស់ទីក្រុងប៉េកាំង លើតៃវ៉ាន់៕