(អង់ការ៉ា)៖ ប្រភពចំនួន៦ ដែលបានទទួលព័ត៌មានអំពីកិច្ចប្រជុំលើកដំបូង រវាងតំណាងរដ្ឋាភិបាលស៉ីរី និងក្រុមហេសបូឡានៅលីបង់ បានប្រាប់ Reuters ថាគូសត្រូវជាយូរមកហើយទាំងពីរនេះ បានជួបចរចាដោយផ្ទាល់នៅក្នុងប្រទេសតួកគី ដើម្បីព្យាយាមបន្ធូរបន្ថយភាពតានតឹង។

អស់រយៈពេលច្រើនឆ្នាំមកហើយ ដែលក្រុមហេសបូឡាបានបញ្ជូនអ្នកប្រយុទ្ធទៅកាន់ស៉ីរី ដើម្បីគាំទ្ររដ្ឋាភិបាលរបស់អតីតប្រធានាធិបតី Assad អំឡុងសង្គ្រាមស៉ីវិលនៅទីនោះ។ បើតាមប្រភពទាំង៦ ដែលបានឱ្យដឹងក្នុងលក្ខខណ្ឌមិនបញ្ចេញឈ្មោះ តំណាងក្រុមហេសបូឡា ព្រមទាំងមន្ត្រីផ្នែកស៉ើបការណ៍សម្ងាត់ និងមន្ត្រីក្រសួងការបរទេសរបស់ស៉ីរី ចូលរួមក្នុងកិច្ចប្រជុំតាមការអញ្ជើញរបស់ស្ថាប័នសន្តិសុខ និងស៉ើបការណ៍សម្ងាត់របស់តួកគីយ៉េ ក្នុងគោលបំណងកាត់បន្ថយភាពតានតឹង។

មន្រ្តីស៉ីរីម្នាក់បាននិយាយថា ភាគីទាំងពីរបានឯកភាពគ្នាបញ្ឈប់អរិភាពដាក់គ្នា ហើយមន្រ្តីស៉ីរីបានធានាដល់ហេសបូឡា ថានឹងមិនលូកដៃក្នុងបញ្ហារំសាយអាវុធរបស់ក្រុមនេះ នៅលីបង់ឡើយ។ ជាថ្នូរមកវិញ មន្ត្រីស៉ីរីបានស្នើឱ្យក្រុមហេសបូឡា ជួយទប់ស្កាត់ការប៉ុនប៉ងរត់ពន្ធឆ្លងព្រំដែន និងរំលាយបណ្តាញសម្ងាត់ដែលនៅសេសសល់របស់ខ្លួន ជាពិសេសនៅតំបន់ភាគខាងត្បូងប្រទេសស៉ីរី។

បន្ទាប់ពីការផ្សាយព័ត៌មាននេះ ការិយាល័យប្រធានាធិបតីតួកគីយ៉េ បានបដិសេធដោយលើកឡើងថា ការអះអាងអំពីជំនួបរវាងមន្ត្រីរដ្ឋាភិបាលស៉ីរី និងមន្ត្រីក្រុមហេសបូឡា នៅប្រទេសតួកគីយ៉េនោះ គឺ «គ្មានមូលដ្ឋានទាល់តែសោះ»។ គណនីបណ្ដាញសង្គម X របស់រដ្ឋាភិបាលស៉ីរី សរសេរជាភាសាអង់គ្លេស ក៏បានបដិសេធផងដែរថា គ្មានកិច្ចប្រជុំបែបនេះកើតឡើងទេ ហើយថាការអះអាងទាំងនេះគឺមិនពិត៕