(រីយ៉ាដ)៖ ក្រុមមន្ត្រីក្នុងតំបន់មជ្ឈិមបូព៌ា និងលោកខាងលិចបានប្រាប់ទីភ្នាក់ងារសារព័ត៌មាន Reuters ថាអារ៉ាប៊ីសាអូឌីតកំពុងរៀបចំផែនការបើកប្រតិបត្តិការវាយលុកប្រឆាំងនឹងក្រុមឧទ្ទាមហ៊ូទីគាំទ្រដោយអ៉ីរ៉ង់មានមូលដ្ឋានក្នុងប្រទេសយេម៉ែន ហើយជម្រើសដែលស្ថិតនៅក្រោមការពិចារណាក្នុងនោះរួមមានការវាយលុកតាមបណ្ដោយឆ្នេរដើម្បីកាន់កាប់ផ្លូវដឹកជញ្ជូនតាមសមុទ្រក្រហម ឬក៏ការវាយលុកលើសមរភូមិច្រើនក្នុងពេលតែមួយ។

ដោយផ្អែកលើក្រុមមន្ត្រីចំនួន ៦នាក់ដែលបានដឹងពីផែនការខាងលើ Reuters បានឱ្យដឹងទៀតថាប្រតិបត្តិការដែលត្រូវបានរំពឹងថានឹងធ្វើឡើងក្នុងពេលប៉ុន្មានសប្ដាហ៍ខាងមុខ នឹងត្រូវដឹកនាំដោយកងកម្លាំងរដ្ឋាភិបាលយេម៉ែន នៅក្រោមការចាត់ចែង និងការគាំទ្រតាមរយៈការវាយប្រហារតាមផ្លូវអាកាសរបស់អារ៉ាប៊ីសាអូឌីត។ ប៉ុន្តែ បើទោះជាមានសហរដ្ឋអាមេរិកអ្នកផ្ដល់ព័ត៌មានសម្ងាត់ ដើម្បីគាំទ្រដល់ប្រតិបត្តិការរបស់ទីក្រុងរីយ៉ាដនៅយេម៉ែន ហើយមានប្រទេសមួយចំនួនក្នុងតំបន់ និងអឺរ៉ុបផ្ដល់ជំនួយយោធាដល់អារ៉ាប៊ីសាអូឌីតក៏ដោយ ក៏សម្ព័ន្ធមិត្តរបស់អារ៉ាប៊ីសាអូឌីតមិនត្រូវបានរំពឹងថានឹងធ្វើអន្តរាគមន៍ ឬចូលរួមដោយផ្ទាល់ក្នុងប្រតិបត្តិការប្រយុទ្ធប្រឆាំងនឹងក្រុមហ៊ូទីនោះទេ។

តាមក្រុមមន្ត្រីខាងលើដដែល គោលដៅចម្បងនៃផែនការរបស់អារ៉ាប៊ីសាអូឌីត នោះគឺកែប្រែការរីកចម្រើនយ៉ាងលឿនរហ័សរបស់ក្រុមហ៊ូទីកាលពីខែកញ្ញាកន្លងទៅ ជាពេលដែលក្រុមឧទ្ទាមមួយនេះវាយដណ្ដើមកាន់កាប់ទីតាំងជាច្រើនកន្លែងនៅតាមបណ្ដោយឆ្នេរនៃសមុទ្រក្រហម ជាពិសេសគឺដណ្ដើមគ្រប់គ្រងច្រកសមុទ្រ Bab el-Mandeb ដែលជាផ្លូវទឹកដ៏សំខាន់មួយសម្រាប់ដឹកជញ្ជូនតាមសមុទ្រក្រហម។

គួរបញ្ជាក់ថា អារ៉ាប៊ីសាអូឌីតបានធ្វើអន្តរាគមន៍យោធាក្នុងសង្រ្គាមស៊ីវិលនៅយេម៉ែន ក្នុងឆ្នាំ២០១៥ តាមរយៈការធ្វើជាប្រមុខរបស់ក្រុមចម្រុះអារ៉ាប់ដើម្បីគាំទ្រដល់រដ្ឋាភិបាលយេម៉ែនគាំទ្រដោយអន្តរជាតិ និងដែលត្រូវបានក្រុមហ៊ូទីវាយបណ្ដេញចេញពីរដ្ឋធានីសាណា។ កិច្ចព្រមព្រៀង បទឈប់បាញ់មួយរវាងភាគីសង្រ្គាមនៅយេម៉ែនដែលត្រូវបានឈានដល់កាលពីឆ្នាំ២០២២ បានរក្សាភាពស្ងប់ស្ងាត់ រហូតដល់ឆ្នាំ២០២៦នេះ ទើបដួលរលំក្រោយអារ៉ាប៊ីសាអូឌីត និងក្រុមហ៊ូទីវាយប្រហារសងសឹកដាក់គ្នាទៅវិញទៅមក។ មិនតែប៉ុណ្ណោះ ក្រុមហ៊ូទីក៏បានប្រកាសការបិទខ្ទប់ប្រឆាំងនឹងកប៉ាល់ដឹកប្រេងអារ៉ាប៊ីសាអូឌីតក្នុងសមុទ្រក្រហមផងដែរ៕