(តូក្យូ)៖ អាជ្ញាធរហិរញ្ញវត្ថុនៅប្រទេសជប៉ុន កំពុងពិចារណាចាត់វិធានការលើក្រុមហ៊ុនធានារ៉ាប់រងអាយុជីវិត Prudential Life Insurance ជុំវិញរឿងអាស្រូវឆបោកលុយដ៏ធំមួយ។ ប្រភពព័ត៌មានបានឱ្យដឹងថា ក្រុមហ៊ុនអាចប្រឈមនឹងការផ្អាកលក់ផលិតផលធានារ៉ាប់រងជាផ្លូវការ។ នេះបើតាមការចេញផ្សាយដោយ សារព័ត៌មានជប៉ុន NHK នាពេលថ្មីៗនេះ។

ទីភ្នាក់ងារសេវាហិរញ្ញវត្ថុជប៉ុន FSA បានចុះត្រួតពិនិត្យការិយាល័យរបស់ក្រុមហ៊ុន Prudential Life Insurance បន្ទាប់ពីមានការលាតត្រដាង កាលពីដើមឆ្នាំនេះថា បុគ្គលិករបស់ក្រុមហ៊ុន បានប្រព្រឹត្តអំពើខុសឆ្គង រួមមានទាំងការឆបោកប្រាក់ពីអតិថិជន។ ទឹកប្រាក់ដែលពាក់ព័ន្ធនឹងរឿងអាស្រូវនេះ មានចំនួនប្រមាណ ៣,៧ពាន់លានយ៉េន ឬស្មើប្រហែល ២៣,៤ លានដុល្លារអាមេរិក។

ប្រភពព័ត៌មានបានឱ្យដឹងថា ទីភ្នាក់ងារ FSA អាចនឹងចេញបញ្ជាឱ្យផ្អាកជាផ្លូវការចំពោះ Prudential Life Insurance ដែលជាបុត្រសម្ព័ន្ធរបស់ក្រុមហ៊ុន Prudential Financial មានមូលដ្ឋាននៅសហរដ្ឋអាមេរិក ពីការលក់ផលិតផលធានារ៉ាប់រង។ លើកចុងក្រោយដែលទីភ្នាក់ងារនេះ បានចេញបញ្ជាផ្អាកការលក់ផលិតផលធានារ៉ាប់រងបែបនេះ គឺកាលពីឆ្នាំ២០១៩ ចំពោះក្រុមហ៊ុន Japan Post Insurance ជុំវិញការអនុវត្តការលក់មិនត្រឹមត្រូវ។

គួរបញ្ជាក់ថា ក្រុមហ៊ុន Prudential Life Insurance បានស្ម័គ្រចិត្តផ្អាកការលក់ផលិតផលធានារ៉ាប់រងដោយខ្លួនឯងរួចហើយ ចាប់តាំងពីខែកុម្ភៈមក៕