(បាងកក)៖ ក្រដាសប្រាក់ដុល្លារអាមេរិកប្រមាណ ១,៧លានដុល្លារត្រូវបានគេប្រទះឃើញលាក់ក្នុងវ៉ាលី នៅឯអាកាសយានដ្ឋានអន្តរជាតិ Suvarnabhumi នៃទីក្រុងបាងកក ប្រទេសថៃ។ នេះបើតាមការចេញផ្សាយដោយសារព័ត៌មានថៃ Khaosod នៅថ្ងៃចន្ទ ទី៥ ខែតុលា ឆ្នាំ២០២៦។

មន្ត្រីគយថៃបាននិយាយថាអ្នកដំណើរជាជនបរទេស២នាក់ដែលបានធ្វើដំណើរចាកចេញពីរដ្ឋធានីហ្សាការតា ប្រទេសឥណ្ឌូណេស៊ី មកដល់អាកាសយានដ្ឋានអន្តរជាតិ Suvarnabhumi ត្រូវបានប៉ូលិសឃាត់ខ្លួន បន្ទាប់ពីរកឃើញក្រដាសប្រាក់ដុល្លារប្រមាណ ១,៧លានដុល្លារលាក់ក្នុងវ៉ាលីរបស់ពួកគេ។ អ្នកដំណើរអាចដាក់លុយសុទ្ធជាប់ខ្លួនចូលទៅក្នុងប្រទេសថៃ ប៉ុន្តែរូបិយបណ្ណបរទេសលើសពី ២០ ០០០ដុល្លារ ត្រូវរាយការណ៍ជូនមន្ត្រីគយថៃ។

បើតាមប៉ូលិសថៃ អត្តសញ្ញាណរបស់ជនបរទេសទាំង២នាក់ខាងលើ និងចំនួនទឹកប្រាក់ពិតប្រាកដនៃរូបិយបណ្ណដុល្លារអាមេរិកដែលត្រូវបាន រឹបអូសមិនទាន់ត្រូវបានបង្ហាញឱ្យដឹងជាសាធារណៈនៅឡើយទេ៕