(វ៉ាស៉ីនតោន)៖ ប្រធានាធិបតីអាមេរិក លោក ដូណាល់ ត្រាំ កាលពីថ្ងៃចន្ទ ទី៥ ខែកញ្ញា ឆ្នាំ២០២៦ បានចោទប្រកាន់ថា ការវាយប្រហាររបស់អ៊ុយក្រែនលើរោងចក្រចម្រាញ់ប្រេងរបស់រុស្ស៊ី គឺជាមូលហេតុដែលធ្វើឱ្យប្រេងឥន្ធនៈនៅមានតម្លៃខ្ពស់ ដោយលោកអះអាងថា សង្គ្រាមអ៉ីរ៉ង់លែងជាមូលហេតុ ដែលនាំឱ្យតម្លៃប្រេងឡើងថ្លៃទៀតហើយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោក ត្រាំ បានសរសេរនៅលើបណ្តាញសង្គម Truth Social របស់លោកដូច្នេះថា «អ្វីដែលកំពុងជំរុញឱ្យតម្លៃសាំងឡើងថ្លៃ មិនមែនជាច្រកសមុទ្រ Hormuz ទៀតទេ ពីព្រោះឥឡូវនេះ មានប្រេងឆៅក្នុងបរិមាណច្រើនជាងពីមុនទៅទៀត កំពុងចេញមកស្ទើររៀងរាល់ថ្ងៃ ប៉ុន្តែរោងចក្រចម្រាញ់ប្រេងរបស់រុស្ស៊ី ដែលកំពុងត្រូវបានអ៊ុយក្រែនវាយប្រហារកម្ទេចឯណោះវិញទេ ទើបជាមូលហេតុ»។

គួរបញ្ជាក់ថា លោក ត្រាំ ដែលគណបក្សសាធារណរដ្ឋរបស់លោក កំពុងប្រឈមនឹងលទ្ធភាពបាត់បង់ការគ្រប់គ្រងសភាអាមេរិក ក្នុងការបោះឆ្នោតពាក់កណ្តាលអាណត្តិ នាខែក្រោយនេះ ក៏បានទម្លាក់កំហុសលើការបិទរោងចក្រចម្រាញ់ប្រេង ដែលលោកអះអាងថា កំពុងកើតឡើងនៅក្នុងរដ្ឋដែលគ្រប់គ្រងដោយគណបក្សប្រជាធិបតេយ្យ ដែលជាគូប្រជែងផងដែរ៕