(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ នៅថ្ងៃអង្គារ ទី៦ ខែតុលា ឆ្នាំ២០២៦ បាននិយាយថារូបលោកនឹងបើកកិច្ចពិភាក្សាតាមទូរស័ព្ទជាមួយប្រធានាធិបតីរុស្ស៉ី លោក វ្ល៉ាឌីមៀ ពូទីន ក្នុងពេលឆាប់ៗ ជុំវិញសេចក្ដីរាយការណ៍ពីករណីបុគ្គលិកមន្ទីរពិសោធន៍រុស្ស៉ីម្នាក់បានស្លាប់សង្ស័យពាក់ព័ន្ធនឹងជំងឺរលាកសួត ខណៈទីក្រុងវ៉ាស៊ីនតោន និងអង្គការសហប្រជាជាតិអំពាវនាវឱ្យមានតម្លាភាពពីទីក្រុងមូស្គូ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

អាជ្ញាធររុស្ស៉ីបានបដិសេធថាពួកគេមិនបានដាក់ចេញវិធានការពិសេសប្រយុទ្ធប្រឆាំងនឹងជំងឺឆ្លងនោះទេ និងច្រានចោលការព្រួយបារម្ភពាក់ព័ន្ធនឹងសេចក្ដីរាយការណ៍ពីឧប្បត្តិហេតុមួយដែលបានកើតឡើងនៅឯវិទ្យាស្ថានប្រយុទ្ធប្រឆាំងជំងឺប៉េស្តក្នុងទីក្រុង Irkutsk នៃតំបន់ស៊ីបេរីកាលពីសប្ដាហ៍មុន។ ប៉ុន្តែ ទីក្រុងវ៉ាស៊ីនតោនបានបង្ហាញការព្រួយបារម្ភយ៉ាងខ្លាំង ដោយតាមរយៈរដ្ឋមន្ត្រីការបរទេសអាមេរិក លោក Marco Rubio បានអំពាវនាវឱ្យមានតម្លាភាពពីរុស្ស៉ី។ «យើងលើកទឹកចិត្តឱ្យរុស្ស៉ីមាន តម្លាភាព និងចែករំលែកព័ត៌មានបន្ថែមជាមួយពិភពលោក ធ្វើដូច្នេះដើម្បីឱ្យពួកយើងទាំងអស់គ្នាអាចចាត់វិធានការឆ្លើយតបប្រកបដោយប្រសិទ្ធភាព និងត្រឹមត្រូវ»។ នេះជាការលើកឡើងរបស់លោក Rubio អំឡុងធ្វើទស្សនកិច្ចទៅកាន់ប្រទេសអ៉ីស្លង់។ អង្គការសុខភាពពិភពលោក WHO ក៏បានអំពាវនាវដូចគ្នានេះដែរ។

ប៉ុន្មានម៉ោងក្រោយមក លោក ត្រាំ បានបញ្ជាក់ថារូបលោកនឹងជជែកជាមួយលោក ពូទីន ពីអ្វីដែលបានកើតឡើងក្នុងពេលឆាប់ៗ។ «ជាការពិតណាស់ ខ្ញុំនឹងមានកិច្ចពិភាក្សាតាមទូរស័ព្ទក្នុងពេលឆាប់ៗ»។ នេះជាការបញ្ជាក់របស់លោក ត្រាំ ឆ្លើយតបទៅនឹងការសាកសួរពីក្រុមអ្នកសារព័ត៌មាននៅឯសេតវិមានថាតើរូបលោកបានជជែកជាមួយលោក ពូទីន លើបញ្ហានេះហើយឬនៅ?

គួរបញ្ជាក់ថា ប្រព័ន្ធផ្សព្វផ្សាយរុស្ស៉ី Baikal កាលពីថ្ងៃសុក្រសប្ដាហ៍មុនបានរាយការណ៍ថាស្ត្រីម្នាក់មានឈ្មោះថា Darya Shipilova អាយុ២៨ឆ្នាំ និងជាបុគ្គលិកមន្ទីរពិសោធន៍ប្រឆាំងជំងឺប៉េស្ត បានស្លាប់ បន្ទាប់ពីរូបនាងធ្លាក់ខ្លួនឈឺដោយសារជំងឺរលាកសួត។ តាមប្រព័ន្ធផ្សព្វផ្សាយមួយនេះ ស្ត្រីរូបនេះប្រហែលជាបានឆ្លងជំងឺឆ្លងរលាកសួតពីបំពង់ដាក់សំណាកដែលបានធ្លាក់បែកដោយចៃដន្យ។ Baikal ក៏បានឱ្យដឹងដែរថាមនុស្សប្រហែលជា ២០០នាក់ត្រូវបានដាក់ឱ្យនៅដាច់ដោយឡែក។ តែទោះជាយ៉ាងណាក៏ដោយ ខាងអាជ្ញាធររុស្ស៉ីបាននិយាយថាមូលហេតុនៃការស្លាប់របស់ស្ត្រីរូបនោះនៅមិនទាន់ត្រូវបានបញ្ជាក់នៅឡើយទេ ហើយអាជ្ញាធរសុខាភិបាលរុស្ស៉ីបានច្រានចោលការអះអាងនៅលើបណ្ដាញទំនាក់ទំនងសង្គមថាវិធានការពិសេសត្រូវបានដាក់ចេញ៕