(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ នៅថ្ងៃអង្គារ ទី៦ ខែតុលា ឆ្នាំ២០២៦ បាននិយាយថាគ្មាននរណាម្នាក់ដឹងនោះទេថាតើនរណាកំពុងដឹកនាំប្រទេសអ៉ីរ៉ង់ អំឡុងសង្រ្គាមរបស់សហរដ្ឋអាមេរិក និងអ៉ីស្រាអែលជាមួយអ៉ីរ៉ង់ដែលបានចូលដល់ខែទី៨។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោក ត្រាំ ធ្វើការកត់សម្គាល់បែបនេះបន្ទាប់ពីអ្នកនាំពាក្យក្រសួងការបរទេសអ៉ីរ៉ង់កាលពីថ្ងៃអាទិត្យសប្ដាហ៍មុនបាននិយាយថាទីក្រុងវ៉ាស៊ីនតោនបានដឹងយ៉ាងច្បាស់ថានរណាជាសមភាគីរបស់ខ្លួនក្នុងប្រទេសអ៉ីរ៉ង់ ហើយថាតើប្រព័ន្ធធ្វើការសម្រេចចិត្តនៅអ៉ីរ៉ង់ដំណើរការទៅយ៉ាងដូចម្ដេច? តែយ៉ាងណាក៏ដោយ លោក ត្រាំ បានលើកឡើងថាអ្វីដែលជាបញ្ហាធំ នោះគឺគ្មាននរណាដឹងថាតើនរណាកំពុងដឹកនាំអ៉ីរ៉ង់នោះទេ? «មេដឹកនាំរបស់ពួកគេត្រូវបានសម្លាប់ ហើយអ្នកដែលត្រូវឡើងបន្តវេនក៏បានបាត់ខ្លួនមិនដឹងថាកំពុងស្ថិតនៅទីណា។ ខ្ញុំមានបញ្ហាដ៏ធំមួយ នោះគឺគ្មាននរណាដឹងថាតើនរណាកំពុងដឹកនាំប្រទេសមួយនេះនោះទេ»។ នេះជាការគូសបញ្ជាក់របស់លោក ត្រាំ។

គួរបញ្ជាក់ថា អតីតមេដឹកនាំកំពូលអ៉ីរ៉ង់ លោក Ayatollah Ali ​Khamenei ត្រូវបានសម្លាប់នៅក្នុងការវាយប្រហារតាមផ្លូវអាកាសនៅថ្ងៃដំបូងនៃសង្រ្គាមរបស់សហរដ្ឋអាមេរិក និងអ៉ីស្រាអែលជាមួយអ៉ីរ៉ង់ដែលបានផ្ទុះឡើងកាលពីថ្ងៃទី២៨ ខែកុម្ភៈ។ លោក Mojtaba Khamenei ដែលជាកូនប្រុសរបស់លោក Ali ​Khamenei បានឡើងស្នងកាន់តំណែងជាមេដឹកនាំកំពូលថ្មីរបស់អ៉ីរ៉ង់ តែលោកមិនទាន់បង្ហាញមុខជាសាធារណៈនៅឡើយទេ បន្ទាប់ពីរងរបួសនៅក្នុងការវាយប្រហារដែលបានសម្លាប់ឪពុករបស់លោក៕