(តូក្យូ)៖ អាជ្ញាធរនៅប្រទេសជប៉ុន នាថ្ងៃពុធ ទី៧ ខែតុលា ឆ្នាំ២០២៦ បានចុះត្រួតពិនិត្យក្រុមហ៊ុនផលិតស្រាបៀរធំៗចំនួន៤ ជុំវិញការសង្ស័យថា ក្រុមហ៊ុនទាំងនេះ ទំនងជាបានលួចគប់គិតគ្នាដំឡើងតម្លៃ ដែលជាការបំពានច្បាប់ស្តីពីការប្រកួតប្រជែង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ក្រុមហ៊ុនដែលកំពុងស្ថិតក្រោមការស៊ើបអង្កេត រួមមាន Asahi Breweries, Kirin Brewery, Sapporo Breweries និង Suntory ដែលសុទ្ធតែជាក្រុមហ៊ុនយក្សទាំង៤ ហើយត្រូវបានរាយការណ៍ថា កាន់កាប់ដល់ទៅប្រមាណ ៩០ភាគរយ នៃចំណែកទីផ្សារស្រាបៀរ របស់ប្រទេសជប៉ុនទាំងមូល។

ប្រភពដែលសុំមិនបញ្ចេញឈ្មោះ បានប្រាប់ AFP ថា ជាលើកដំបូងបំផុត គណៈកម្មការត្រួតពិនិត្យការធ្វើពាណិជ្ជកម្មរបស់ជប៉ុន JFTC បានចុះឆែកឆេរទីតាំងរបស់ក្រុមហ៊ុនទាំងនេះ ដើម្បីស៊ើបអង្កេត ការចោទប្រកាន់អំពីការគប់គិតគ្នាកំណត់តម្លៃស្រាបៀរលក់ដុំ។ ប្រភពដដែល បាននិយាយថា ការកំណត់តម្លៃរួមគ្នានេះ ទំនងជាបានកើតឡើង ក្នុងរយៈពេលប៉ុន្មានឆ្នាំកន្លងមក ដោយអំឡុងពេលនោះ តំណាងមកពីក្រុមហ៊ុនទាំង៤ ត្រូវគេជឿថា បានជួបគ្នាជាប្រចាំ ដើម្បីពិភាក្សាអំពីតម្លៃ និងពេលវេលានៃការដំឡើងតម្លៃ។

តាមប្រព័ន្ធផ្សព្វផ្សាយក្នុងស្រុកជប៉ុន ក្នុងពេលប៉ុន្មានឆ្នាំចុងក្រោយ ក្រុមហ៊ុនទាំងនេះ បានដំឡើងតម្លៃស្រាបៀរជាច្រើនលើក ដោយលើកឡើងពីការឡើងថ្លៃវត្ថុធាតុដើមនិងថ្លៃដឹកជញ្ជូន។ ក្រុមហ៊ុនទាំង៤ បានទទួលស្គាល់ថា ពួកគេកំពុងស្ថិតក្រោមការស៊ើបអង្កេត ហើយបានប្តេជ្ញាថា នឹងសហការយ៉ាងពេញលេញ ជាមួយការស៊ើបអង្កេត។

គួរបញ្ជាក់ថា ការចុះត្រួតពិនិត្យនេះកើតឡើងបន្ទាប់ពី JFTC ធ្លាប់បានបើកការស៊ើបអង្កេតករណីគប់គិតស្រដៀងគ្នាមួយ កាលពេលកន្លងទៅក្នុងឆ្នាំនេះ លើក្រុមហ៊ុនផលិតការ៉េមធំៗចំនួន៦ ។ ក្រុមហ៊ុនទាំងនោះ ត្រូវបានចោទប្រកាន់ថា បានចូលដៃគ្នាដំឡើងតម្លៃការ៉េម អស់រយៈពេលជាច្រើនឆ្នាំ លើសពីកម្រិតដែលអាចទទួលបាន ពាក់ព័ន្ធការកើនឡើងនៃតម្លៃវត្ថុធាតុដើម៕