(តូក្យូ)៖ កងកម្លាំងអាមេរិកនៅខេត្ត Okinawa នៃប្រទេសជប៉ុន នាថ្ងៃពុធ ទី៧ ខែតុលា ឆ្នាំ២០២៦ ត្រូវបានហាមឃាត់មិនឱ្យផឹកគ្រឿងស្រវឹងរយៈពេល ៤៨ម៉ោង ហើយក៏ប្រឈមនឹងបម្រាមគោចររយៈពេល៣០ថ្ងៃផងដែរ បន្ទាប់ពីមានករណីឃាតកម្មលើស្ត្រីម្នាក់ ដែលត្រូវបានចោទប្រកាន់ថា ប្រព្រឹត្តដោយទាហានម៉ារីនអាមេរិក។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ករណីនេះបានបង្កការខឹងសម្បារជាខ្លាំងនៅក្នុងប្រទេសជប៉ុន ជាទីដែលបទល្មើសពាក់ព័ន្ធនឹងកងកម្លាំងអាមេរិក បានដុតបញ្ឆេះការរិះគន់កាន់តែខ្លាំងឡើងៗ ជាយូរមកហើយ ចំពោះវត្តមានរបស់កងទ័ពអាមេរិក។

ឧត្តមសេនីយ៍អាមេរិក លោក Benjamin T. Watson ដែលជាមេបញ្ជាការកងកម្លាំងម៉ារីន III Marine Expeditionary Force ឈរជើងនៅខេត្ត Okinawa បានប្រកាសហាមឃាត់ទាំងស្រុង ចំពោះការផឹកគ្រឿងស្រវឹង ទាំងនៅក្នុងនិងនៅក្រៅមូលដ្ឋានយោធា ចាប់ពីថ្ងៃពុធនេះ។ មិនតែប៉ុណ្ណោះ លោកក៏បានប្រកាសការអនុវត្ត បម្រាមគោចររយៈពេល៣០ថ្ងៃ ចាប់ពីថ្ងៃសុក្រ ដែលនឹងកំណត់ឱ្យបុគ្គលិកយោធាអាមេរិកទាំងអស់ ត្រឡប់ចូលមូលដ្ឋានជាកំហិត នៅត្រឹមម៉ោង ២៤៖០០។

លោក Watson បាននិយាយថា រយៈពេល៤៨ម៉ោង ដែលត្រូវបានហៅថា «ការផ្អាកប្រតិបត្តិការបណ្តោះអាសន្ន» នឹងផ្តល់ពេលវេលាដល់មេបញ្ជាការ ដើម្បីដឹកនាំការបណ្តុះបណ្តាល សម្រាប់សមាជិកកងកម្លាំងទាំងអស់ អំពីស្តង់ដារ វិន័យ និងការទទួលខុសត្រូវ ក្នុងនាមជាសមាជិកនៃសហគមន៍ Okinawa។ លោក Watson ដែលជាមន្ត្រីយោធាអាមេរិកជាន់ខ្ពស់បំផុត នៅ Okinawa បាននិយាយថា ក្នុងអំឡុងពេលនេះ ប្រតិបត្តិការនឹងត្រូវផ្អាក ហើយនឹងមិនអនុញ្ញាតឱ្យមាន ការចេញក្រៅមូលដ្ឋានដាចខាត។

គួរបញ្ជាក់ថា តាមការលើកឡើងរបស់ប៉ូលិសជប៉ុន កាលពីថ្ងៃអាទិត្យចុងសប្តាហ៍កន្លងទៅនេះ ទាហានម៉ារីនអាមេរិកម្នាក់ ដែលឈរជើងនៅ Okinawa ត្រូវបានចាប់ខ្លួន ក្រោមការសង្ស័យ បានសម្លាប់ស្ត្រីអាយុ៣៩ឆ្នាំម្នាក់ នៅសណ្ឋាគារមួយក្នុងទីក្រុង Naha និងបានលួចកាបូបលុយរបស់នាង។ ប្រព័ន្ធផ្សព្វផ្សាយក្នុងស្រុកជប៉ុន បានរាយការណ៍ថា ស្ត្រីរូបនោះត្រូវបានច្របាច់ករហូតដល់ស្លាប់ ខណៈទាហានម៉ារីនអាមេរិកម្នាក់នោះ បានបដិសេធការចោទប្រកាន់៕