(រីយ៉ាដ)៖ មន្ត្រីអាមេរិក និងមន្ត្រីការពារជាតិស៉ីរីមួយរូបបានឱ្យដឹងថា ប្រទេសស៉ីរីអាចនឹងបញ្ជូនកងទ័ពទៅជួយអារ៉ាប៊ីសាអូឌីតក្នុងការប្រយុទ្ធប្រឆាំងក្រុមហ៊ូទីនៅយេម៉ែន ខណៈក្រុមដែលមានទំនាក់ទំនងជិតស្និទ្ធជាមួយអ៉ីរ៉ង់នេះ កំពុងបង្កើនការវាយប្រហារដោយប្រើមីស៉ីល និងយន្តហោះដ្រូនលើអារ៉ាប៊ីសាអូឌីត ដែលបានបណ្តាលឱ្យមនុស្ស ៣នាក់ស្លាប់ក្នុងសប្តាហ៍នេះ។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃព្រហស្បតិ៍ ទី៨ ខែតុលា ឆ្នាំ២០២៦។

លទ្ធភាពនៃការចូលរួមដោយកងកម្លាំងស៉ីរីនៅក្នុងសមរភូមិដែលរាលដាលចេញពីជម្លោះរវាងសហរដ្ឋអាមេរិក និងអ៉ីរ៉ង់ បង្ហាញឱ្យឃើញថាសង្គ្រាមស៉ីវិលនៅយេម៉ែនដែលបានផ្ទុះឡើងវិញនោះ បង្កជាភាពវឹកវរថ្មីទៀតដល់តំបន់ដែលកំពុងស្ថិតក្នុងភាពតានតឹងស្រាប់ទៅហើយ ព្រមទាំងបង្កហានិភ័យនៃការទាញប្រទេសនានាក្នុងតំបន់ឱ្យធ្លាក់ចូលទៅក្នុងសមរភូមិប្រយុទ្ធដ៏លំបាកលំបាកនៃតំបន់ភ្នំ។

អារ៉ាប៊ីសាអូឌីត ក៏ព្យាយាមស្វែងរកការគាំទ្រពីបណ្តាប្រទេសសម្ព័ន្ធមិត្ត រួមទាំងតួកគីយ៉េ និងប៉ាគីស្ថានផងដែរ ទោះបីជាការគាំទ្រនោះគ្រាន់តែជាផ្នែកភស្តុភារ ឬក្នុងកម្រិតការពារខ្លួនក៏ដោយ។ កិច្ចខិតខំប្រឹងប្រែងនេះកាន់តែមានភាពបន្ទាន់ឡើង ដោយសារតែការវាយប្រហាររបស់ក្រុមហ៊ូទី ទៅលើហេដ្ឋារចនាសម្ព័ន្ធរបស់ខ្លួន ដូចជាករណីវាយប្រហារដ៏សាហាវទៅលើព្រលានយន្តហោះកាលពីដេីមសប្តាហ៍នេះជាដើម។

នៅព្រឹកថ្ងៃព្រហស្បតិ៍នេះ មានគេឮសំឡេងផ្ទុះខ្លាំងៗជាបន្តបន្ទាប់នៅក្នុងទីក្រុងរីយ៉ាដ។ Reuters មិនអាចផ្ទៀងផ្ទាត់បានទេ ខណៈមិនមានការអត្ថាធិប្បាយជាផ្លូវការភ្លាមៗ ឬការជូនដំណឹងព្រមានជាមុនជាសាធារណៈនោះទេ ទោះបីជាអ្នកការទូតមួយចំនួនបាននិយាយថា ពួកគេបានទទួលការព្រមាន ហើយសាលារៀនមួយចំនួននៅក្នុងទីក្រុងរីយ៉ាដ បានជូនដំណឹងដល់អាណាព្យាបាលអំពីការណែនាំឱ្យស្នាក់នៅក្នុងទីតាំងសុវត្ថិភាពក៏ដោយ។

ក្រុមហ៊ូទី បានប្រកាសពីការវាយប្រហារលេីអាកាសយានដ្ឋានអន្តរជាតិ King Khalid ក្នុងទីក្រុងរីយ៉ាដ ដោយប្រើមីស៊ីលបាលីស្ទីគ៕