(អង់ការ៉ា)៖ រដ្ឋមន្ត្រីការបរទេសតួកគីយ៉េ​ លោក Hakan Fidan បាននិយាយនៅថ្ងៃព្រហស្បតិ៍នេះថា តួកគីយ៉េកំពុងវាយតម្លៃពីរបៀបជួយអារ៉ាប៊ីសាអូឌីតក្នុងការការពារខ្លួនប្រឆាំងការវាយប្រហារដោយក្រុមហ៊ូទីនៅយេម៉ែន ក្រោមលក្ខខណ្ឌនៃកិច្ចព្រមព្រៀងការពារជាតិរួមគ្នាជាមួយប្រទេសប៉ាគីស្ថាន ប៉ុន្តែលោកបានបដិសេធលទ្ធភាពដែលតួកគីយ៉េនឹងចូលរួមក្នុងប្រតិបត្តិការវាយលុក។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃព្រហស្បតិ៍ ទី៨ ខែតុលា ឆ្នាំ២០២៦។

Mecca Joint Defence Agreement ជាកិច្ចព្រមព្រៀងការពារជាតិរវាងតួកគីយ៉េ ប៉ាគីស្ថាន និងអារ៉ាប៊ីសាអូឌីត ដែលមានចែងថាការវាយប្រហារប្រដាប់អាវុធលើសមាជិកណាមួយ ត្រូវបានចាត់ទុកថាជាការវាយប្រហារលើសមាជិកទាំងអស់។ វាត្រូវបានចុះហត្ថលេខា កាលពីខែសីហា ហេីយចាប់តាំងពីពេលនោះមក ប្រទេសទាំង ៣បានរៀបចំកិច្ចប្រជុំផ្នែកនយោបាយ និងយោធា ដើម្បីឆ្លើយតបទៅនឹងការវាយប្រហាររបស់ក្រុមហ៊ូទី។ នៅថ្ងៃចន្ទដេីមសប្តាហ៍ មា​នការឯកភាពគ្នាអនុវត្តជាបន្ទាន់នូវការប្តេជ្ញាចិត្តការពារគ្នា និងធានាឱ្យមានការដាក់ពង្រាយយ៉ាងឆាប់រហ័សនូវកងកម្លាំង និងបរិក្ខាយោធានៅក្នុងប្រទេសអារ៉ាប៊ីសាអូឌីត។

ថ្លែងនៅក្នុងទីក្រុង Ankara លោក Fidan បានសង្កត់ធ្ងន់ថា កិច្ចព្រមព្រៀងនេះមានលក្ខណៈការពារខ្លួនជាជាងការចូលរួមវាយប្រហារ ដោយលោកបញ្ជាក់ថា ក្រុមមន្ត្រីយោធាកំពុងវាយតម្លៃលើការរួមចំណែកដែលអាចធ្វើទៅបាន ជាពិសេសលើផ្នែកការពារដែនអាកាស សង្គ្រាមអេឡិចត្រូនិក និងការគាំទ្រផ្នែកបច្ចេកទេស។ លោកបន្ថែមថា នេះគឺជាកិច្ចព្រមព្រៀងជួយការពារគ្នា ពេលដែលប្រទេសជាភាគីនៃកិច្ចព្រមព្រៀងរងការវាយប្រហារ តែមិនមែនជាកិច្ចព្រមព្រៀងសម្រាប់ការវាយប្រហារនោះទេ ហេីយតួកគីយ៉េ នឹងមិនបញ្ជូនកងទ័ពទៅកាន់ប្រទេសផ្សេង ដើម្បីធ្វើការវាយប្រហារលើទឹកដីរបស់ប្រទេសដទៃឡេីយ។

គួរបញ្ជាក់ថា តួកគីយ៉េ ដែលមានកងទ័ពធំជាងគេទីពីរក្នុងអង្គការណាតូ (NATO) និងមានឧស្សាហកម្មការពារជាតិដ៏រឹងមាំ បានថ្កោលទោសការវាយប្រហាររបស់ក្រុមហ៊ូទី លើអារ៉ាប៊ីសាអូឌីត ព្រមទាំងបានបង្ហាញឆន្ទៈក្នុងការជួយបំពេញតម្រូវការផ្នែកបច្ចេកទេសយោធារបស់ទីក្រុងរីយ៉ាដ និងបានយល់ព្រមចូលរួមជាមួយក្រុមចម្រុះដឹកនាំដោយអារ៉ាប៊ីសាអូឌីត ដើម្បីធានាសុវត្ថិភាពនៃការធ្វើនាវាចរណ៍នៅក្នុងសមុទ្រក្រហម៕