(អាថែន)៖ មន្រ្តីជាន់ខ្ពស់ពីររូប បានប្រាប់ទីភ្នាក់ងារព័ត៌មាន Reuters នៅថ្ងៃព្រហស្បតិ៍ ទី៨ ខែតុលានេះ ថាប្រទេសក្រិកយល់ព្រមចំណាយថវិការហូតដល់ ៤ពាន់លានដុល្លារ ដើម្បីធ្វើទំនើបកម្មយន្តហោះចម្បាំង F-16 បន្ថែមទៀត និងទិញមីស៉ីលទំនើបៗពីសហរដ្ឋអាមេរិក បន្ទាប់ពីមានដំណើរទស្សនកិច្ចរបស់រដ្ឋមន្ត្រីការបរទេសអាមេរិក លោក Marco Rubio។

មន្ត្រីជាន់ខ្ពស់ម្នាក់នៃក្រសួងការពារជាតិក្រិក និយាយថា «កិច្ចព្រមព្រៀងនេះរួមបញ្ចូលទាំងមីស៉ីល និងគ្រាប់បែកទំនើបៗថ្មីៗ សម្រាប់យន្តហោះចម្បាំង F-16 Viper និង F-35 ព្រមទាំងឧទ្ធម្ភាគចក្រ Black Hawk។ លើសពីនេះក៏មានការធ្វើឱ្យប្រសើរឡើងនូវយន្តហោះចម្បាំង F-16 ស៊េរីចាស់ៗ ទៅជាប្រភេទ Viper ទៀតផង»។

មន្ត្រីរូបនោះបន្ថែមថា គម្រោងទិញភាគច្រើនត្រូវបានដាក់បញ្ចូលក្នុងផែនការការពារជាតិរយៈពេលច្រើនឆ្នាំរបស់រដ្ឋាភិបាលក្រិក ហើយវានឹងមិនបង្កជាសម្ពាធបន្ថែមដល់ស្ថានភាពហិរញ្ញវត្ថុរបស់ប្រទេសនោះទេ។ ចំណែកមន្ត្រីជាន់ខ្ពស់នៃក្រសួងការបរទេសមួយរូបទៀត បានទទួលស្គាល់ចំណុចខាងលើនេះ ដោយបន្ថែមថាការចំណាយនឹងត្រូវបែងចែកជាដំណាក់កាលក្នុងរយៈពេលច្រើនឆ្នាំ។

ក្រិកបានគ្រោងរួចជាស្រេចហេីយក្នុងការចំណាយថវិកាប្រហែល ២៨ពាន់លានអឺរ៉ូ នៅត្រឹមឆ្នាំ ២០៣៦ ដើម្បីទិញយន្តហោះចម្បាំង F-35 និងឧទ្ធម្ភាគចក្រដែលផលិតនៅសហរដ្ឋអាមេរិក ព្រមទាំងដើម្បីសាងសង់ប្រព័ន្ធការពារពហុស្រទាប់ប្រឆាំងនឹងមីស៉ីលបាលីស្ទីគ និងប្រព័ន្ធការពារដែនអាកាសច្រេីនស្រទាប់ដោយប្រើប្រាស់អាវុធផលិតនៅអ៉ីស្រាអែល។

ក្រិកបានព្រមព្រៀងទិញយន្តហោះចម្បាំង F-35 ចំនួន ២០គ្រឿង និងឧទ្ធម្ភាគចក្រ Sikorsky UH-60M Black Hawk ចំនួន ៣៥គ្រឿងនៅក្នុងឆ្នាំ ២០២៤។ ប្រទេសនេះកំពុងធ្វើទំនើបកម្មយន្តហោះ F-16 ប្រហែល ៨២គ្រឿងឱ្យទៅជាប្រភេទ Viper និងមានបំណងធ្វើទំនើបកម្មយន្តហោះប្រភេទ Block 50 ចំនួន ៣៧គ្រឿងទៀតឱ្យទៅជាប្រភេទ Viper គិតជាទឹកប្រាក់អស់ប្រហែល ១ពាន់លានដុល្លារ៕